Melbourne/Neuseeland

January - February 2023
A 37-day adventure by Corinne
  • 6footprints
  • 2countries
  • 37days
  • 78photos
  • 1videos
  • 39.7kkilometers
  • 37.4kkilometers
  • Day 2

    In 24 Stund vo Daunejagge zu Flip Flops

    January 22, 2023 in Australia ⋅ ☀️ 25 °C

    Nach insgsamt knapp 20 Flugstunde und emme stressige Umstiege in Doha sin mir meh oder weniger bequem aber guet um Mitternacht in Melbourne acho. Bis mir unseri Täsche gha hän, die nätti Migrationsmitarbeiterin uns ohni Schuehkontrolle durewunke hett und mir mit em Taxi im Hotel gsi sin, ischs denn nomol 2 Stunde gange. Todesmuetig hämer dr Wecker trotzdäm uf die 9i gstellt und uns uf Erkundigstour beghä. Unsere erschte Kontakt zu de Stadtbevölkerig hämer denne mit ere französische Källnerin gha, wo au erscht siet eme Monet do isch, aber henu e biz Franzöisch rede, schadet jo au nütt ;-).
    Witter isch es denn am Fluss entlang, durch schmalli Gässli mit vielne Ässensständ, schöni Arkade, ganzi Strossezüg mit viel Streetart und riesige Parks und Skulpture gange bis mir uns, biz erschöpft aber glücklich, am Fluss öbbis Znacht mit australischem Wyy und denn Schlummis an dr Bar, wo im Fluss amene Bruggepfiller agmacht isch, gönnt hän.
    Read more

  • Day 4

    Drämli fahre für Dummies

    January 24, 2023 in Australia ⋅ ☁️ 24 °C

    In Melbourne cha me im innere Stadtkärn gratis Drämli fahre, e cooli Sach, wenn me denn au wüssti, wo dä Stadtkärn ufhöre würd... Und will mir das natürli nid geüsst hän und uns au nid grad die fehlende Beschriftige use an de Haltstelle ufgfalle sin, sin mir halt e paar Haltstelle schwarz gfahre - zum Glück aber ohni Kontrolle.😎
    Dr Räscht vom Wäg in Zolli hämer denn aber brav z'Fuess gmacht und drbi nomol e grosse Park mit Blick uf d'Skyline vo Melbourne entdeggt. Dr Muffin, wos im Zolli zum Zmorge ghä hett, hetti au locker als Proviant für dr ganzi Dag glängt. Als Alternative hettis aber sunscht nur no dr Häppli-Muffin gha 🙄.
    Früsch gstärkt hämer uns denn in erschte Themerundgang ufmacht und bis uf d'Baby-Hippos au alles gseh. Im zweite Themegebiet hetts denn mit schlofende Ottere und emene nid sichtbare Tiger agfange, aber d'Schmätzgis und natürli d'Elefante hän alles usegrisse. Im australischi Teil sin zum Glück die schlofende Wombats ume gsi, wyl mir sunscht dangg fehlende Koalas, Kängurus und Emus nur vieli leeri Gheck agluegt hette. Defür hämer drnoch fascht alles zgseh becho, mit Usnahm vom zweite Tiger, wo sich au liebr verstseckt hett. Alles in allem ischs aber e schöne Zollibsuech gsi 🙂.
    Zrugg simer denn dr ganzi Wäg glofe und hän dörffe erfahre, dass es au im australische Summer mol cha rägne.
    Wiedr trocke und zwäg gmacht, isch denn richtig Nightsession vo de Australian Open gange. Dank unsere sensationelle Plätz uf Höchi vom Netz hän mir eifach nur grad miesse abeluege und sin in Gnues vomene guete erschte und emene sehr guete zweite Match cho. Erstuunlich wieviel Grieche in Australie dehei sin und natürli für dr Stefanos Tsitsipas Stimmig gmacht hän.
    Dag 3 vo Melbourne hett mit dr Jagd nach Drämlibillet agfange, mir hän jo nid scho wiedr welle schwarz fahre. Dodefür mues me sich e Chärtli chaufe und denn Gäld für d'Fahrt druff lande. Tönt eifach, isch aber e Herusforderig, wyl me niene usefindet, was denn sone einzelni Fahrt in Zone 1 koschtet. Zudäm hetts au nur gfühlt e Hand voll Automate in dr ganze Stadt..... Gmäss relativ aktuellem Reiseführer sin mir devo usgange, dass e Fahrt 4.50 koschtet und hän jewiils gnueg Gäld für Hi- und Ruckwäg druffdo. Im Drämli sälber hebt me denn Charte an s'Läsegrät und das zieht dr passendi Wärt ab, somit hett me kei Ahnig, wieviel denn no druff isch. Aber ok, für d'Hiifahrt kei Problem. Somit sin mir denn richtig St. Kilda Beach gfahre und hän uns dört als erschts e feins Zmorge gönnt. Drnoch hämer e churze Spaziergang durch dr botanischi Garte unternoh und sin denn bis zum Strand spaziert. Nätterwies hetts dört imene Kaffi no Platz uf de Liegstiehl unter em Sunneschirm diräggt am Strand gha. Und so hämers uns e paar Stund am Stramd loh guet go. Ganz go bade simer nid, aber s'Meer e biz usprobiere, isch scho dine glängge. E sehr glungene Nomidag.
    Zrugg im Drämli hämer denn unseri Charte wiedr ans Läsegrät ghebt und tarra z'wenig Gäld druff gha, wyl e Fahrt ebbe doch keini 4.5 meh koschtet. Wyls aber jo au keini Automate an de Haltstelle hett, simer denn alt scho wiedr schwarz gfahre und au diesmol nid verwüttscht worde. Isch also nid so eifach das Drämmlifahre in Melbourne.... 😆
    Für dr Obe hän mir uns no d'Ussicht vom Skytower, em höchste Gebäude vo Melbourne, welle gönne. Zusätzlich hett me au no d'Möglichkeit gha, in e Glaswürfel s'go, wo me denn 300m hett chönne abeluege, aber das isch nid so beidruggend gsi, wies tönt hett. Defür isch d'Ussicht uf d'Stadt und Umgäbig sensationell gsi. Bi Cider/Bier und Snacks hämer uns denn dr Sunneuntergange dört obe gönnt. E schöne Schlusspunggt für dr Melbourne Ufenthalt
    Read more

  • Day 6

    E Traum wird wohr

    January 26, 2023 in New Zealand ⋅ 🌙 15 °C

    Zum unsere Flueg vo Melbourne uf Christchurch z'verwüttsche, hän mir churz nach de 5i am Morge e Taxi brucht und tarra um die Zyt funktioniert dr Taxi-Rufchnopf im Hotel trotz ca. 10 Versiech nid.... aber dank unserem Hotel grad bim Bahnhof, hän mir nach churzem Fussmarsch dört eins gfunde.
    Bim Warte uf dr Flieger sin mir nätterwies beschtens vome neuseeländische Medizin-Studi unterhalte worde, wobi sini Tipps eh scho uf unserer To do-Lischte gsi sin und är jez aber weiss, dass 2 Wuche für ganz Europa azluege, e biz knapp chönnti si.
    Nach em eher churze Flueg, dr Visa-Kontrolle durch die nätti Zöllnerin und dr wittere Kontrolle durch die nid ganz so nätti Beamtin vo de biologische Sicherheitsbehörde isch es denn ändlich so wiet gsi und mir hän neuseeländische Bode beträtte 🥰🥳.
    Christchurch hett uns denn mit blauem Himmel und 27° empfange 😎. Dank em Tramdepot näbem Hotel hett me sich au grad wie dehei gfühlt.
    Nach em Erdbäbe vo 2011 isch zwar vieles wiedr ufbaut worde, me seht dr Stadt d'Schäde aber immerno a. Immer wiedr hetts Gebäude, wo no Stützpfiler dra sin oder au Baute, wo no miend abgrisse wärde. Brägend fürs Stadtbild isch au d'Kathedrale, wos no Johre wird go, bis sie wiedr ganz isch.
    Drnäbe sin vieli modärni, aber passendi Neubaute vorhande. Alles in allem versprieht Christchurch e ganz eigene Charme.
    Am nächste Dag hett uns dr Bus us dr Stadt brocht und e Gondelbahn uf dr Hügel. Nach emene Fussmarsch sin mir denn mit atemberaubende Usblick belohnt worde.
    Zrugg in dr Stadt hämer uns s'Nostalgie-Trämli gschnappt und sin demit e Rundi go dreihe. Dr Chaffeur versorgt eim drbi mit spannende Infos und schwarzem Humor. Durchus e lohnendi Akktivität.
    Dr Dag usklinge hän mir denn in eim vo de vielne Rooftop-Restaurants. Dr sintflutartigi Räge hett dr Schlummi verhinderet, aber immerhi isch bi uns s'Wasser abglofe, im Gegesatz zu Auckland.
    Read more

  • Day 8

    Willkomme Rhea

    January 28, 2023 in New Zealand ⋅ 🌙 13 °C

    Christchuch hett uns zwar gfalle, aber unseri Wunschortlischte isch no lang und und drum isch d' Zyt zum Witterzieh cho. Dodefür hän mir zrugg an Flueghafe miesse und vo dörte witter zur Autovermietig. Am Flueghafe sälber isch dank de Überschwemmige vo Auckland und de drum gstrandete Persone, e heilloses Chaos gsi. Mir hän zum Glück eifach nur dr Shuttle-Bus miesse näh und churz drufabe, d'Rhea - unser Auto - dörffe in Empfang näh 😃. Nach chleine Startschwierigkeite (welles Auto hett scho kei Handbrämsi???) und em Ygwöhne ufs links fahre und vor allem ufs Blinke mit dr rächte Hand (dr Schiebewüscher chunnt halt öfters zum Zug...), hän mir uns denn uf unseri erschti Etappe gmacht, wo uns uf Oamaru gführt hett. Dörte hämer im erschte Versuch e Platz uf em Campingplatz diräggt am Meer ergatteret 😎. Spontan hetts no Platz in dr Pinguin-Tour gha und so hämer ab em Ydunkle de weltchleinschte Pinguin (nur max. 30 cm und 1 Kg schwer) bim Anlandcho und s'Näscht finde, chönne zuluege. Glychzytig hän sich an däm Strand au no Seehünd oder ähnlichs tummlet. Bim retour zum Auto go, hett me denn miesse ufpasse, dass me nid über e Pinguin gstolperet isch, wyl die plötzli überall gsi sin. Unseri erschti Nacht in dr Rhea isch no biz chalt und improvisioniert gsi, aber schomol nid so schlächt. Für die nächste Campingnächt hän mir uf jede Fall scho biz giebt.Read more

  • Day 9

    Vo Stei zu Stei

    January 29, 2023 in New Zealand ⋅ ⛅ 16 °C

    Wie chönnt me denn dr Dag schöner starte, als mit emene faine Zmorge im Kaffi diräggt am Strand🤩. Im Kaffi hett uns denn no dr Severin us Rapperswil agschnurrt, wo siet 2019 in Neuseeland isch und irgendwie wäge Corona und anderem nümm heichunnt. Wie är das visumstechnisch macht, isch uns zwar e Rätsel, aber henu...
    Schön und praktisch an Neuseeland isch, dass vieli Sehenswürdigkeite relativ noch an de Strosse sin und me drum in churzer Zyt einiges cha gseh. An däm Dag sin mir zerscht go Maori Steizeichnige go aluege, denn hämer e Spaziergang in de Elephant Rocks gmacht, sin witter zu de Moreaki Boulders und zum Schluss no spontan an e schöne Strand no biz go laufe.
    Um uns in Sache Campig nid grad z'überfordere, hän mir uns denn 2 Nächt imene Hotel in Dunedin gönnt und mit biz Glück au no öbbis Znacht becho - d'Restaurants mache spötischtens am 9i zu 🫨🫨
    Read more

  • Day 10

    Faszinierendi Begägnige

    January 30, 2023 in New Zealand ⋅ ⛅ 16 °C

    Für dr hüttigi Dag isch dr Bsuech vo dr Otago-Peninsula bi Dunedin uf em Programm gstande. Spontan hän mir uns vor em Wäg uf d'Halbinsle no e Bootstour zum Albatros-Watching buecht und sin denn frohen Mutes und mit no gnueg Zyt gstartet, zum vor däre Tour no e Stund e Rundgang in de Düne zmache. Unser Navi hett sogar d'Startadrässe vo däm Rundwäg gfunde, aber nid verrote, dass me do defür uf emene Kieswäg mues go offroade.... Uf dr ganze Kiesstrecki hetts denn gnau 1 Abzwiegig ghä, wo aber grad vomene Bagger blockiert worde isch, so dass mir dr anderi Wäg gno hän und prompt falsch gsi sin 🫣😆
    Nach em Umdreihe und em retour offroade, hän mir denn beschlosse, dass d'Zyt für dä Rundwäg jez doch biz knapp wäri und mir drum lieber s'Schlössli uf dr Halbinsle gön go aluege. Dört acho hän mir denn anhand vo de Ytrittspriise beschlosse, dass mir nur d'Gärte möchte gseh.... S'Schlössli sälber hetti zwar, wie sichs ghört, sowohl über e dragischi Liebesgschicht wie au über e spukendi Ex-Schlossherrin verfiegt, isch aber eher eifach e Herrehuus gsi und vo usse au schön. D'Besichtigung vo de Gärte hett sich aber dopplet glohnt, es hett sehr cooli Pflanze gha und d'Ussicht uf d'Buecht isch dr Hammer gsi!
    Nach em gmietliche Kaffi im Schlossgarte hämer uns denn zu de Albatros ufgmacht. Tollerwies isch d'Tour mit emene chleinere Boot duregführt worde. Am Afang hetts für jede e Fäldstächer ghä und denn ischs ans Tierli sueche gange. Als erschts hän mir denn grad Seelöwe und au e paar Chleini Pingus, wo am umeschwümme gsi sin, gseh. Drnoch simer zu de Albatros cho und hän vo de 2 Crew-Mitglieder viel Spannends erfahre. Es isch sensationell gsi, wo denn die erschte Albatros mit ihrer 3 Meter Flügelspannwieti in unserer Nöchi am Schwäbe gsi sin 🤩.
    Scho rächt gflasht vo däre Tour hämer uf em Ruckwäg no unser Glück am Allans Beach versuecht und prompt mehreri grossi Seelöwe am Strand entdeckt. Die sin dört eifach am Sünnele gsi und hän sich au völlig entspannt loh aluege, solang me e biz Abstand ighalte hett. E mega Erläbnis und eifach sensationell!!!
    Read more