Big Bend Nationalpark

Fa New Orleans siwer witer nach Gonzales in Texas gfahro, wawer äs super Barbecue gässo hei und Nacht ufma Camping im Nirgendwo verbrungo hei. Derna siwer witer zum Big Bend Nationalpark gedüst. Am erschto Tag heiwer am Morgo än 4 stündigi Wandrig zu "The Window" gmacht, wawer e wunderbari Üssicht ufs Land kä hei. Biner Wandrig bin vor allem ich nu nid so wohl gsi, willnisch uberall Bärglöwe, Bäre oder Schlange hätti chene uber de Wäg löife. Gottlob heiwer dero abr nid gseh. Will so heiss isch gsi heiwer am Namittag nur nu e churzi Fahrt durch de Park gmacht und si de witer ufe Camping, willernisch ufe erfrischendi Dusch gfreut hei. Aber uf dem Camping acho, heiwer gmerkt das da uberhöipt nix git üssr äs ToiToi. De heiwernisch halt wohl oder übel mit Wasser gwäsche, dasme de nid gat allzu dräckigs ins Bett hed miesso. Am negschto Morgo siwer früeh üf und los ver de Sunnoüfgang ga z lüego. Derna heiwer e stündigi Wandrig inu Santa Elena Canyon gmacht, was nisch sehr imponiert häd. Wills wieder so heiss isch gsi siwer am Namittag de nu e churzi Wandrig zuma andro Canyon ga macho. Nah der Wandrig siwe zum Visitor Center gfahro und hei gottlob ver 2 Dollar chene dusche. Küm üsser Dusch üssa, heds vorna gegwittrot was häd mägo. Wier hei de e schutz gwartot und sie de losgfahro was e biz nahgla hed. Aber sones Gwitter häni sälto erläbt :)Read more