White Sands National Monument

Fa Carlsbad Caverne siwer am Morgo früeh witer nach Alamogordo in New Mexiko gfahro. Da heiwer de zersch im Camping igitscheggt (diz mal heiwernisch eppis gunnt ver zwei Nächt 😉). Derna siwer diräkt zum White Sands National Monument gfahro. Da heiwer e paar churzi Spaziergäng uber die endlose wisse Sanddüne gmacht. Äs isch sehr beeidrucked gsi, will eifach 20 Minüte fame Städji ewäg iner eher karge Wieschti ufzmal en rieso grossi Flächi wisse Sand isch, wa üsgseht wie Schnee. Wills de aber eso gwinde hed und chalt isch gsi heiwer deicht wier geh zersch mal ga z Nacht ässo. D Luscht ufne Burger häd nisch beidi packt drum siwer ima Diner, wand häsch miesse im Auto bstelle und öi ässo ga en Burger ässo. Mit vollem Mago siwer zrug ze Sanddüne und si der Sunnuunergang ga lüego. Am negschto Morgo siwer üf und äs isch z schönscht Wätter gsi. Drum heiwer Pancakes gmacht, aber währund dum ässo häds afa züe tüe. Drum siwer nahm ässo nu biz ins Bett gläge und hei mit der Mama und dum Norma telefoniert. Nahm Telefo isch z Wätter immer nu schlächt gsi und äs hed nu meh afa rägno. Drum heiwernisch ins Bett verpflanzt und hei Netflix glüegt. Am dri isch z Wätter immer nu himmelärdotrürig gsi. Drum siwer de schnell ga ichöifo und si ga Mexkanisch ässo, willwer in dem Rägo nid hei chene choche😢 Aber äs isch super gsi und mit vollen Mage siwer de ins Bett und hei en ischchalti Nacht verbracht. Da isch nixmeh mit churze Hose und z Fenschter sperrangelwitoffe.Read more