Willkomme im Paradies *_*

Am Flughafe stoh, ehn security mänsch froge wele bus denn uf honolulu zum waikiki beach god & ehn ärnsthafti antwort becho - hawaii hed mich vom erste momänt ah begeistered. Ich bi so ufgregt gsii ah so ehmene schöne Ort döffe z sii und bi bis jetzt no keis bizli entüscht worde.

Ah mim erste Tag han ich natürlich so schnell wie möglich is Meer müsse go schwimme und chli sönnele. Nacher bini chli dur d Stadt spatziert und ha mer öbbis z ässe kauft und bi denn weder zrug ah strand go schwimme und läse bis d sonne under gange esch. Es esch ehn unglaublich schöne sonneuntergang gsii. Wo ich zrug i mis hostelzimmer cho bin han ich det all mini zimmergnosse versamled am bier trinke gfonde. Dem han ich mich natürlich müsse ahschlüsse. Am Schluss simmer als wild zämegwürfleti gruppe dur d bars vo honolulu zoge.

Am nöchste Tag bin ich denn zu de Manoa Falls gloffe. Ehn extrem schöni Wanderig dur de Wald füehrt zu ehmene Wasserfall wo mer zum dusche cha verwände. Es hed es bizli viel Lüüt gha aber ich has trotzdem mega gnosse. Ich ha mer eifach viel Ziit gno zum all die schöne Bäum und Vögel usw. ahzluege. Wo ich zrugg is Hostel cho bin hani Julie (eini vo mim Zimmer vo Québec) ahtroffe und mer händ entschiede zäme go z Poste und Znacht z ässe. Mer sind zu somene mega bekannte Japaner wo mer zwar ca. 20 min muss warte bis mer inne chonnd, defür aber für ned mol 5 Dollar ehn Noodel Soup mit sälber gmacht Nudle bechond. Am obig simmer denn weder mit allne Zimmergnosse i Usgang

Au de nöchsti Tag bin ich denn mit de Julie mit. Mer send früeh uf und händ de Koko Head trail gmacht. De wäg füehrt es alts Bahngleis deruf und esch sehr ahstränged - deför esch d Ussicht dobe toll. Nacher simmer no i Hanauma Bay go schnorchle. De Strand esch sehr überloffe gsii, ned werklich toll. S schnorchle esch aber mega schön gsii und mer händ sehr viel Fisch i allne Farbe gseh. Ca am 3 händ mer üs denn weder uf de Heiwäg gmacht weil d Julie höt no uf ehn anderi Insle flügt. Ich bi zrugg im Hostel, mache mini Wösch und vellecht no schnell es Mittagsschlöfli :)Read more