Calakmul

Calakmul esch eini vo de gröschte Maya-Städt und sie lied zmitzt im Wald. Au wenns zimlich ufwändig esch det hii z fahre hämmer die umbedingt welle gseh!

Wells chum möglich esch ah eim Tag det hii und weder zrugg z reise hämmer am Obig vorhär in Xpujil übernachted. Üses Höttli det esch alles Anderi als luxuriös gsii aber immerhin heds Muggenetz gha - vo Chäfer heds nämmlich nur so gwimmled. Mer send in Xpujil go Tacos ässe, Profiant för de nöchsti Tag chaufe und denn früeh is Bett.

Am nöchste Morge sind mer scho am 6i weder wiiter gfahre. Mer händ ghofft ca. am 8ti ahzcho und so nonnig viel Touriste z träffe - de Plan esch ufgange. Leider heds aber au no kei Guide ume gha 😅. De Spatziergang dur de Wald esch no schön gsii. Mer händ Affe, Vögel, ehn Fuchs, viel Summervögel aber "leider" kei Jaguar gseh. Zu de Ruine hämmer denn ganz viel Schilder chönne läse und am Schluss no uf die zwoi grosse Tempel ufe laufe. 40m Stäge deruf und das zwoimol mit sehr müehsame riise Tritt esch huerre ahsträngend. Aber förd Ussicht heds sich glohnt! Uf de zwoit Ruine hämmer üsi Sandwiches und Fröcht gässe und händs gnosse. Es esch werklich ehn Ihdrücklich Maya Stadt und dass rundume Kilometer wiit eifach Wald esch machts no viel besser!Read more