Spanish & Surf - la Punta

Ehn typische Tag in LaPunta fod am Morge früeh mit surfe ah. Ich pressiere chli mit mich parad mache well ich wedermol bis zu de letschte Minute gschlofe ha, schmiere mer chli vo dem Zinkzüg is Gsicht und de ghöri dosse au scho de Surfleherer nach mer rüefe. Ich quetsch mich hinde ih sis Auto inne und fo chli afo Smaltalk mache mit de zwoi andere Surferine wo höt mitchömed. Mer send alli öbbe uf ehm gliche afänger Level und chömed guet us. Am Strand ahcho schnappe mer üs üsi Brätter und es god ab is Wasser. Det blibe mer mindestens 2h. Mer händ 2 Surflehrer för die 3 Lüüt wo üs mit ehmene Schopf hälfed gnueg Schwong z ha, üs Tips gänd und säged werums vorhär ned klapped hed. Ih de Pausene wo mer ufd Wäälle warted möche mer chli Üebige zum besser chönne ufstoh oder sie üebed chli Spanisch mit mer wells ja wössed dass ichs möcht lehre. Nach de Surfstund gömmer zrogg zum Auto. Ich chauf mer no ehn fröschi Kokusnuss well die eifach so schön erfröschend sind und weder neui Energie gänd. Denn werd ich zrug is Hostel gfahre.

Det ahcho schrieb ich schnell minere spanisch Lehrerin ich sig jetzt fertig, gang go dusche und nimm denn es Taxi is Kaffi wo mini Lehreri gseid hed sig sii grad. Am Taxifahrer verzell ich dass ich probieri spanisch z lehre und er üebt grad no chli mit mer. Im Kaffi ahcho bstell ich zerst mol es Bananebrot und ehn Frappucino und mach chli Husufgabe. Denn fod mini Lektion ah. Es god schnell vorwärts mer reded viel ich muss probiere Züg vorzläse und lehre ganz viel neui Wörtli. Nach 2h esch mis Hirni Matsch - do god nüt meh inne. Mini Lehreri nimmt sich es Taxi zum zom nöchste Schüeler z fahre. Ich laufe no chli dord Lädeli und entscheid denn die ca. 45 minute zum Hotel am Strand entlang zrug z laufe. Deheime mach ich nomol chli Husufgabe und lese es bizeli bevors schoweder Ziit esch för de Sonneuntergang. Ich gang ah Strand zum de go luege und triffe det mini Lehrerin, ehri Kollegin und ehn andere Schüeler. Mer trinked zäme es Bier und gnüssed d Strandstimmig. Denn gömmer go Tacos ässe und no eis go näh. Es bliibt aber bi eim well morn morge früeh wämmer ja weder surfe!

So gsänd mini Täg jetzt scho ehn ganzi Woche us und wärded nomol eini so wiiter goh. Usserdem han ich no einisch ehn Nachtsboottour gmacht zum mit lüchtendem Plankton go schwimme. Das esch sehr toll gsii!Read more