Acatenango

Als Abschied vo Guatemala han ich mich no ah es ächts Highlight äne gwogt. Mit 4000 m.ü.m esch de Acatenango Vulkan de höchsti Punkt vo Central Amerika und de esch mit ehnere 4-6 Stündige Wanderig erreichbar. Ich ha übers Hostel ehn 2 tägigi Tour buecht und bi scho am nöchste Tag mit 22 andere Abentüürlustige im Bus ghocked.

D Wanderig esch sträng aber machbar gsii. Mer händ ca. 4h brucht bis zum Basecamp (inkl. Pause) und es esch alles bärguf gange. Im Basecamp händs üs denn gseid dass es sich ned lohni för de Sunneuntergang ganz ufe z laufe wells im Momänt z viel Wolche heig. Mer händ also üsi Zält bezoge und händ de Nomittag denn am Füür verbrocht. Es hed Popcorn, Marshmallows und heissi Schoggi gäh. Zum Znacht hämmer denn Spagetti becho und wos ändlich dunkel worde esch hämmer denn au gseh für was mer do ufe gloffe sind: De Vulkan spuckt Lava. Alli händ probiert möglichst gueti Bilder häre z bringe aber so werklich festhalte cha mer das eifach ned! Ich wär am liebste nie is Bett well mer nie weiss wenn die nöchsti Eruption chonnd. Da d Sunneufgangswanderig aber am 04.00 ahgseid gsii esch hani de glich früeh müsse go schlofe - ehn zimlich schlächte Schlof zum ehrlich sii. Es esch chalt gsii im Zält, es hed ine gwinded, esch umbequem gsii und so bin ich sicher all Stund wedermol verwached.

D Wanderig am 4ri esch denn s strängste vom ganze Usflug gsii. Es esch zwar eigentlich "nur" no 1.5h deruf gange aber de wenig Schlof und vorallem d Höchi händ mer zuegsetzt. Uf 4000 m bechonnd mer halt eifach chli weniger Suurstoff und so werds Schnufe sträng und eim werd schnell schlächt. Um so stolzer bin ich gsii wo ichs denn gschafft ha und de wunderschöni Sunneufgang ha döffe ahluege. Vo ganz obe hed mer au d Eruptione us nöchster Nöchi gseh!

Nach ehm Sunneufgang heds no Zmorge gäh und denn simmer de ganz Wäg weder abe gloffe. Das hed sich rächt id längi zoge und esch mega id Bei. Ich bi froh gsii wo ich denn im Hostel ahcho bi und mer ändlich ehn langi warmi Duschi ha chönne gönne.

Jetzt hock ich im Flugzüüg uf Panama mer duet immerno alles weh vo gester aber ich bi au scho extrem gspannt uf de neui Ort!Read more