Corcovado National Park

Was för es Erläbis! Ich bi uf Panama zum de Rägewald ahluege und bin schlussändlich uf Costa Rica well mer z Panama alli vo dem schöne Nationalpark vorgschwärmt händ - ich ha min Rägewald becho...halt eifach ned z Panama.

De Nationalpark esch nöch ah de Gränzi und mit ehnere 7h Busfahrt, 1h ahstoh am Zoll, nomol 2h Busfahrt und so 20 min Bootsfahrt erreichbar. Ich ha es Hostel in Puerto Jimez gha wo au Toure dor de Nationalpark ahbieted. De Hostelbsitzer esch sälber im Dschungel ufgwachse und weiss eifach alles über d Tier und Pflanze.

Am erste Tag esch er mit üs go Krokodil füettere. Eigentlich füetteri er us prinzip kei Wildtier. Aber die Krokodil läbed so nöch am Badestrand wo sini Familie immer gieng go schwimme und die einzig Sicherheitsvorcherig wo sie heiged sigs halt sie eifach immer satt z halte.

Am zwoite Tag simmer denn mit ihm uf ehn Dschungel Tour. Es sind insgesamt 21 kilometer gsii wo mer dor de Wald gloffe sind und mer sind ufgrund vo de Ahfahrt und de viele Tier wo mer gseh händ über 12h unterwägs gsii. Mer händ Schlange, Üle, Papageie, Fuultier, Nasebär, Ameisibär, verschiednigi Affearte, giftigi Frösch und Tukan gseh. Dezue natürlich de wunderschöni, mänschelääri Strand und all die faszinierende Bäum mit ihrne interessante eigeschafte. Mer händ au gwössi Blätter wie z.B Hibiskus und Chäfer diräkt useme Baum probiert.

Ah mim letschte Tag bin ich denn mit einere us mim Hostel no uf eignigi Fust los. Mer händ ah Matapala Strand welle go de King Louis Wasserfall ahluege. Mer händ alles sehr spontan gnoh und so esch de Wasserfall am Schluss eher ehn Näbesach worde. Im Hostel esch üs gseid worde mer chienged ohni Bedänke via Aurostopp richtig Park fahre und so hämmers denn au gmacht. Mer händ zwoi Iheimischi gfonde wo üs ufd Abladeflächi vo ihrem Pick Up händ loh sitze - was üs ehn super Ussicht gäh hed. Mit dene simmer denn usversehe chli z wiit gfahre. Uf ehm Wäg zrug hed üs ehn Mitarbeiter vo ehmene mega luxus Jungel Hotel mitgnoh und üs verzellt dass mer bi ihne au nor chieng go es Kaffi trinke und trotzdem d Ussicht über de Jungel gnüsse - do hämmer ned chönne nei säge. Mer händ im Nachhinein usegfonde dass es Zimmer über 700$ pro Nacht esch - das erklärt au das luxuriöse Badzimmer mit verschiednige Lotions und gratis Moskito Spray und allem - merci mer händs chönne bruche ;). Es Fruchtsäftli mit Jungel Ussicht und ehmene Tukan am Baum näbedra - das hed sich glohnt. Denn simmer aber denn werklich zum Wasserfall. Also zerst ah Strand. Go Fotis mache, Surfer zueluege und nach langem laufe au mol Zmittag ässe. De Wasserfall esch denn wie scho erwähnt weniger spektakulär gsii. Uf ehm Rückwäg hämmer no ehn Amerikaner troffe wo frösch es Hotel ufdoh hed. Er hed üs zwoi Fuultier ih de Bäum zeigt und üs es Stück uf sim Töff mitgnoh. Am Schluss hed er üs no voller Stolz sin Garte zeigt und üs chli Chrütli zum Choche mitgäh. Schlussändlich hämmer denn gnau de Bus verwütscht zrug is Hostel und händ nach Rücksproch mit üsem Guide tatsächlich es paar Chrüttli zum choche chönne bruche.

Was für ereignisriichi Täg :). Jetzt bin ich grad in David in Panama. Ha höt ussert do hi reise gar nüt gmacht und das au absolut gnosse!Read more