Satellite
  • Day 167

    Arequipa

    January 17, 2019 in Peru ⋅ 🌧 20 °C

    Ganz ehn tolli Stadt mit vielne härzige Kaffis und Sache zum ahluege! Mer sind mit ehm Nachtbus am Morge am 5i ahcho und händ drum ehn lange müede Tag zum durebringe gha. Zerst simmer es richtig grosses guets Zmorge gässe. Denn simmer zrug is Hostel go wiiter plane und ichecke und denn am Nomittag uf ehn walkingtour. Nach de walkingtour simmer go Coca Tee trinke, zwoi Chilene go ahluege und denn go Alpaka ässe - muss mer ja mol probiert ha wenn mer scho in Peru esch.

    Am nöchste Morge hämmer schoweder am 3 müsse ufstoh zum ih üsi 2 tägigi Wanderig durs Colca Canyon z starte 😣. Nach ehnere sehr lange Bus fahrt (üse Bus esch unterwägs kaputt gange und merhäbd mit ehmene lokale wiiter müsse) simmer denn so am 10ni ändlich los gwandered. Zerst simmer zwoi Stund abe gloffe denn nomol so 15 minute deruf zum Zmittag platz. Es hed Riis mit Gmües, Alpaka und Avocado gäh. Nacher simmer nomol 2.5 h uf meh chli hügelige Wäg bis zu de Oase gloffe wo üsi Lodge fürd Nacht esch. Det ahcho simmer im Pool go bade, sind chli umeghockt und denn grad nach ehm Znacht is Bett. Am Morge hämmer nämlich scho am 4ri weder gstarted zum d Sunne vermide bim deruf laufe. Au das esch nomol chli meh als zwoi Stund gange - es esch sträng gsii aber da jede ih sim eignige Tempo hed chönne laufe guet machbar. Und das eschs denn au gsii mit ehm Wandere. Mer händ denn no Zmorge gässe, sind ih heissi Quelle go Bade, händ ah verschiednige Ussichtspünkt ghalte und sind am Obig weder in Arequipa ahcho. Mer sind alli go Dusche und denn uf es Bier und spöter es Znacht id Stadt. Es esch schliesslich üse letschti Obig gsii bevor mer am nöchste Tag alli i anderi Richtige wiiter sind.

    Für mich heds früeh ufstoh keis ändi gnoh. Min Bus esch am 5i uf Cusco gfahre. Ich ha ehn ganze Tag im Bus verbrocht und gönn mer jetzt höt ehn gmüetliche Plan und Chill Tag.
    Read more