Wahle uf de Philippine

Ih dem Footprint gods um nüt wo ich erläbt ha sondern nur ums korrupte Wahlsystem wo ich gärn schnell wott erkläre för die wos interessiert ☺️.

Ich bi mit ehm Bus is Dörfli Moalboal greist. Per Zuefall han ich de ersti Tag vo ehmene lange Wuchenänd usgsuecht zum reise was dezue gfüehrt hed, dass ich extrem lang ha müsse warte bis ich ih ehmene überfüllte Bus platzt gha ha 😅.

De Vorteil vo de Warterei: Ich ha mich mit ehnere Philippinerin über ihres Wahlsystem chönne unterhalte. Das esch so spannend und schockierend gsii dass ichs gärn schnell möcht erkläre. Ich ha ned alli Infos dezue und cha nur wiiter gäh was mer d Lüüt so verzellt händ - cha also ned verspräche dass alles 100% stimmt.

Vorgester sind d Wahle gsii. Jedi Ortschaft hed ihre "Bürgermeister" gwählt. Wähle cha mer nur persönlich und ih sim Heimatsort - darum die ganzi reiserei.

Ich ha mich denn aber gfrogt: Werum möched das so viel Lüüt? Zwoi Stund uf de Bus warte denn vier Stund müehsami Fahrt und dezue no für vieli sehr knapps Gäld für de Bus usgäh nur zum go abstimme? Und bi üs sind vieli scho z fuul es Couvert uf Post z bringe und sich chli z Informiere? Ich ha nochegfrogt und müsse feststelle...

Nei Philippiner sind ned extrem politikinteressiert und vorbildlich - es god au do weder ums Gäld (natürlich ged usnahme). Vieli richi Kandidate verspräched es "dankes Gäld" wenn mer sie wählt. Sie verpackeds schön als Dank fürd Wahlbeteiligung, Zeiche, dass sie sich ums Volk kümmered oder ähnlichs aber schlussändlich blibts Bestächigsgäld. Sie wo mer das alles erklärt hed, hed mer verzellt ihri Familie heig ihre ahglüte und gseid sie müss unbedingt cho, ei Kandidatin versprächi 1000 Pesos! Das esch guet 1/10 Monetsihkomme! Wenn mer ih de Schwiiz vo ehmene Durchschnittslohn vo 5500.- usgod wäred das 550.- ah jede Wähler! Grad für Familie wo weniger verdiened (und das münd vieli sii wenn mer überleid dass de Bürgermeister gnueg hed zums usem Fänster rüehre ziehd er de Schnitt zimlich sicher ufe) esch das unglaublich viel Gäld. Wie offiziell die ganz Bestächig ablauft ha ich ned usegfunde. Die Frau am Busbahnhof hed das als zimlich normal dargstellt. Ich ha aber au ghört, dass ei Kandidatin es Video mit ehnere Gäldversprächig uf Facebook glade heig und so ehn zimliche Skandal usglöst heig - ich bi also ned ganz secher wie legal und offiziell das ablauft es ändered aber nüt dra dass es passiert. Mini Busbahnhosfskollegin hed entschlosse für die Meistbietendi z stimme. Sie seid es siged sowieso all Kandidate schlächt, wärded ned viel ändere und sie chieng s Gäld werklich bruche 🤷🏼‍♀️ ich cha sie ergendwie verstoh. Sicher geds au viel Lüüt wo grad zum trotz ehn Kandidat wähled wo sich gäg bestächig wehrt und es guets Program usgarbeited hed - aber am Schluss gwönni, gmäss minere Erklärerin, ja doch de wo am meiste Gäld ahbieti und die moralische Wähler gönd läär us.Read more