Tag 30 - 32: Strandtäg Zanzibar

Eifach Ferie vo de lange Fahrte und ehm Zält! Ganzi 3 Nächt hämmer do am Strand ih ehmene schöne Hotel verbrocht. Es esch super entspannend gsii mol niened hii z müsse und au mol chli mis eignige Ding chönne z mache ohni immer um d Gruppe ume z sii.

De ersti Morge han ich zum Tauche gnötzt - das esch extrem guet gsii! Mer händ ehn Tintefisch, wunderschöni Koralle und riesige Fischschwärm gseh. Am Nomittag bini mit es paar coole Lüüt ih de Strandbar ghocked. Zum Znacht esch üs ehn lange Tisch ah Strand brocht worde und mer händ üs vom Restaurant loh verwöhne.

De zwoiti Tag esch nur zum erhole do gsii. Nach ehm riesige Zmorgäbuffet han ich mich mit einere Kollegin für ehn lange Strandspatziergang entschiede. Nach guet ehnere Stund laufe hämmer no anderi vo üsere Gruppe ahtroffe und sind alli zäme zrug gloffe. Am Nomittag hani ih de Hängematte gschlofe und bi chli go schwimme. Mer händ denn nomol alli zäme de Sunneuntergang gluegt und händ üses letschte Znacht under de Stärne vo Zanzibar gnosse.Read more