Satellite
  • Day15

    Garden Route - Knysna

    March 14 in South Africa ⋅ ☀️ 21 °C

    Dank mim Lieblingscousinli simer ja überhoupt druf cho uf Südafrika ds ga und wüu si sech bestens uskennt ds Knysna heimrs üs natüerlech nid la näh die Stadt ds bsueche.

    Knysna spricht me übrigens fasch so us wie "nice" und "na" und das isch die Stadt übrigens oh. Ächt NICE. 🤩

    Übernachtet heimr uf Thesen Island imne airbnb. Ds isch sone Insle wo die Riiche wohne. Me muess sone Barriere passiere wome d ID muess zeige, bevor eim Unifomierti inkl. chugusicherer Weschtä lö la passiere.

    Wasme sech nid darf la entga isch d Waterfront. Äs hett es paar Lädä und Restaurant und me hett ä super Ussicht uf d Lagune vo Knysna.

    Im ile de pain heimr äs super Zmorge gha wos mega feins Brot hett gäh. Hei für öppe CHF 3.- ä rise Brotchorb bsteut und ds womer ni hei möge chönne mitnäh. Ds hett när glängt für Apero und nomau es Zmorge. Top👌

    Wäsche chame bi dä Laundry Girls. 5kg Wösch chöme für öppe CHF 10.- tiptop gstriglet u gsträut sogar direkt id Ungerkunft gliferet weme ds e so wott.😍 Für üs 2 ä Troum wüu ds Wäsche dahei geng so müehsam isch mit üsem fixe Zitfänschter.

    Nach 2 Wuche Superspar und Tanksteueshops simer im beschtä Läbensmittulade vo ganz Südafrika gsi. Food Lover's Market heisstr. Mir hei üs grad mit Trochefleisch und Wy ideckt.😊

    Am Nami heimr wöue ga Gleitschirm flüge abr d Thermik isch irgendwie schlächt gsi drum heimr leidr nid chönne ga. Aus Troscht hetts när Apero mit guetem Wy gäh.🍷😎

    Mir wäre gärn no id Featherbed Beachbar wome mitm Wassertaxi härächunnt. Aber leidr hetts nid glängt. Mir si nämlech iz scho uf dr Fahrt nach Plettenberg Bay.

    Ds Fazit isch uf jedefau: Ds Knysna lahtsechs la läbä.😎
    Read more