Satellite
  • Day21

    Kapstadt

    March 20 in South Africa ⋅ 🌧 9 °C

    2 Täg lang simer in und um Kapstadt ume ungrwägs gsi. Zämä mit de beste Tourguides ever.😍 Wüu d Karina und dr Zaack sech so guet uskenne, heimr i dere churze Zit mega viu gseh.

    Äs Highlight füre Marco isch sichr dr Blouberg Strand bi Sunneuntergang gsi. So viu Kitesurfer uf eim Huufä. Dr Marco wär am liebste gd no e Wuche blibe zum ga kite.

    Mir hett dr Foodmarket ar Waterfront mega passt, dert chönnti mi äuä satt schnouse. 😝😅

    Apropos...mir hei dänkt äs würd üs sichr nid schade, üs mau widr chlei ds bewege. Dr Plan wär gsi ufe Lion's Head ds wandere, wüus aber es paar Täg vorher dert hett brönnt gha, heimer nid ufe dörfe.

    Mir si ja bekanntlech flexibu, aso simer witer nach Kalksbaai. Äs härzigs Fischerdörfli südlech vo Kapstadt. Dert am Hafä hani no es paar Selfies mit Seelöie chönne mache, wo uf dr Hafämuur hei gsünnelet.🤩

    Dr Marco hett när no uf maps.me e churzi Wanderig ufe Kalksbaai Hügu gfunge. Äs sigi e 45 mimütigi Wanderig, vou locker u so, hettr gmeint. Öppe nach 20 Minute isch nümm klar gsi wo dr Wäg isch und mir si regurächt dür ds Gstrüpp gstoglet. Iz gsehni us aus hätt öpper mini Bei uspeitscht, bi dene risige Strieme u Chratzer woni aktuell ha.😂 Für ganz ufe simer no es paar Feuse ufeklätteret, d Ussicht isch uf jedefau super gsi und wisechs ghört heimr dobä äs Bünzlischwizer-Picknick gmacht mit Brot und Biltong (Trochefleisch). Gipfuwy odr -bier heimr leider nid drbi gha. Skandalös, i weiss.🙈
    Nachdäm mir nach öppe 3 Versüech ändlech irgendwie widr die Feuse abe cho si, ohni dasses 10 Meter grad ds Loch abegeit, heimr dä mitm Gipfubier natüerlech dringend müesse ga nachehole.😅🍺 Vorher heimr abr no hurti ä Abstächer uf Simon's Town gmacht zum ga Pinguine luege.

    Dr Marco hettsech no gwünscht gha, am letschte Abä im Hard Rock Cafe ga Znacht ässe. So heimr no e letschte kitschige Sunneungergang am Strand chönne erläbä. Bi Dunkuheit ufe Signalhill ga d Liechter vodr Stadt luege, isch fasch obligatorisch. Dr Wahnsinn.👌

    Üse Abschied heimr de när leidr mit Tee und Softgetränk müesse begiesse. Wägem Coronavirus hett Südafrika äs Aukohou-Usschankverbot ab de 6i verhänkt. Weiss zwar nid wases gnau söu bringe abr okay...

    Üses Apartment zmitts ir Stadt mit Blick ufe Tafubärg und Lion's Head isch übrigens super gsi. Was sehr idrücklech isch gsi, si die 100erte vo Obdachlose wo Schuutere a Schuutere ufem Trottoir rund um üses Apartment hei müesse schlafe. Ds fahrt ächt ih und zeigt nomau wie schön mirs ir Schwiz hei. Mir chöis üs nämlech ussueche, die meischte vo dene Obdachlose Lüt dert, nid.

    Nomau äs grosses Merci für die wunderbare Täg in Kapstadt ad Karina und a Zaack.😘
    Read more