Joined March 2018Living in: Naters, Switzerland
  • Day18

    Bocas del Toro #1

    March 31, 2018 in Panama ⋅ ☁️ 12 °C

    Där edwin het scho iner schwiz gseit, är chämä de eu mit uf bocas. Bocas del Toro isch än chleini inselgruppa im karibischu meer aner gränza zu costa rica. Äs isch wirkli äs chleis paradies.
    Vaner heuptinsla heiwer tagestourlini zu annru inslä, schönu stränd und koralluriffs gmacht wawer si ga badu und ga schnorchlu. Da heiwär ä hüfu seestärnä, korallä in allu farbä, delphinä und fültiär gseh.
    Ämabu iner happy hour vaner hotelbar heinsch jedä tag ä strüss pfäfferminz ver ischi mojitos gibrücht. Spetär isch de der edwin meischtens motiviärtä gsi ver ga party z’machu, da hei wiär nimmä chännu mithaltu.
    Übrigens chumund va hiä di chiquita bananä.
    Read more

  • Day12

    Boquete

    March 25, 2018 in Panama ⋅ ☀️ 21 °C

    In boquete a cho, siwer schnäll in ischi unnerchunft ga d‘ruckseck dartüe und de diräkt eppis ga ässu. Zum glick, will emabu isch im ganzu dorf der strom ewäg gsi und alli beize hend züegita. Im näbilwald fam nationalpark la amistad heiwer isch de ufu wäg gmacht der quetzalvogil zgse und si erfolgrich gsi, wie mu ufum letschtu foto gseht (vilicht is öi en grossi päja).
    Iner letscht nacht heiwer es unagnähms erläbnis ka: vor ischum zimmer isch eppis grossus hin und her gseklut und hed aner vergittrut port fam hüs grüttlut. Di patron druf agsprochu, hed isch de nid genau wellu säge was das gsi isch. Wie wier erfahru hei gits uriwohner und grossi tieri wie leoparde und wildschwii wa alli nid seli gäru tourischte hend.
    Read more

  • Day9

    Volcan

    March 22, 2018 in Panama ⋅ 🌬 19 °C

    Fer ämbiz du heissu temperature z’endflieh heiwer Volcan als neschts ziel bestimmt. Volcan isch än ort am füäss vam vulkan barú. Där yonis het gmeint är miässä sowieso da durch fahru, de nähmädär nisch gad mit. Der fahrdiänscht het schich schritt ver schritt zunera gfiährtu tour durch z‘hochland va panama entwicklut. Fa kulinarische spezialitäte bis luxoriösi hotelalage isch alles derbi gsi. Am ziel achu meindär, är miässä no gad richtig cerro punta äs euto ga alüägu, wiär sellä doch eu no mitchu.... und witer gangu isch di tour.
    Härpfil und anners gmies tiendsch hie uf jedum hang apflanzu. Da chännund sogar d’ämbdini nu eppis lehru. Ufum rückwäg hedär de doch no gad äswa aghaltu und eppär wildfrämds gfregt obs ächt iner region äswa än jeep z‘vercheufu gäbä.
    Da der barú ständig im näbil isch (drum säge wier dum bärg öi wolkan) siwer fa ischum ursprünglich plan ufu vulkan z‘stigu abchu.
    Im 2. und 3. tag siwer vill zfüess unnerwägs gsi: im tropischu wald, zwischu kaffeefälder und ine chleini schlucht. Di schlucht „Macho de monte“ selle anschinund es versteckts juwel si. Isch het gidücht deru schluchtä gäbäs zwischu zaniglas und stalu äs halbs duzunt.
    D‘liit fa panama tient meglichscht wenig löifu, äs gid ja der bus oder z‘auto wa mu cha nä. Drum hend isch de summi liit öi komisch aglüeged wenn wier di 2 stunde zum hotel si gluffu.
    Read more

  • Day7

    David

    March 20, 2018 in Panama ⋅ 🌙 26 °C

    Fa pedasi bis david hei wer 3 mal miessu umstigu. Alles hed super giklappt bis wer uf santiago si cho. Jede bus uf david isch volle gsi und wier hei fasch gmeint wier chäme da nimme ewäg. En busfahrer hed isch de nach ebiz jeissu, iner kabina wa normalerwiis der busfahrer schlaft, mitgnu. Wie wier speter erfahru hei, isch das nit ganz legal gsi. In david heiwer mit dum edwin abgmacht ka. Der edwin isch fa miner basi der maa und fa panama.
    In david isch grad fiirtag gsi und es hed en grosse umzug mit guggumüsige und 10‘000 riter gigä.
    Wartu, bi gfühltu 45 grad, isch in panama alltag, sigs will der bus volle isch oder will niemert genau weiss wenn der umzug afaht, aber niemert regt schich üf. Wier hei de 2 stunde iner klimatisiert bäckerii gwartut bis der umzug afaht. Emabu siwer de nu mit dum edwin und schinum kolleg, dum yonis (va dem kehrädär de no meh), an die „feria“ gangu. Das isch eppis zwischu „vifra“ und openair. Da heiwer iisch durch di biervielfalt fa chleine panamaische braueriie durchgikämpft.
    Read more

  • Day4

    Pedasi

    March 17, 2018 in Panama ⋅ ⛅ 24 °C

    Där erscht halt absits va hochu hischini und vill vercheer isch pedasi im südu va panama gsi. Äs isch än bekannti fischer-, und feriuregion ver panamaer und eu üsländer. Dˋfahrt het imä liduschaftlich dekoriärtu bus mit landestypischer müsig agfangu (jodel mit handorgla) und imä nit klimatisiärtu minibussji zwischu baru senioru gˋändut. Vor ort heiwer erfahru, dass da waale, thunfischä, schildchrotä und, und, und het... im öigschtu. Wiär si de trotzdem ver än tag uf dˋ“isla iguana“. Da heiwär zu ischer uberaschig unzähligi leguanä gseh. Sit de wissäwär was „iguana“ biditut.Read more

  • Day1

    Panama Kanal

    March 14, 2018 in Panama ⋅ ⛅ 31 °C

    Där panamakanal isch supär gsi. Vam Bsüächärzentrum gseht mu leidär di neuu schleusä wa im 2016 sind fertiggsstellt wordu nit, darver gseht mu dˋaltu, wa scho uber 100 jahr in betrieb sind. Und die sind sehr idrücklich.

  • Day0

    Panama city

    March 13, 2018 in Panama ⋅ ⛅ 31 °C

    In Panama City trifft alt uf neu und arm uf rich. Im bankuviertul mit du modernschtu hochhischini gäbund schich cravattä di klinka in hand und äs quartiär witär kijund di paraggä scho fasch vam alüägu usenand.
    Alls in allum het nusch d‘heuptstadt nit so imponiärt, aber z‘ceviche ufum fischmmärt isch der hammer gsi.Read more

Never miss updates of Sandra und Franco unnerwägs with our app:

FindPenguins for iOS FindPenguins for Android