Evandale und Cataract Gorge Reserve

Dr Ken ud Sunny, üser Vermieter, hei üs dr Tip gäh, dass hüt z Evandale wieder ä Markt isch. Natürlich hei mir üs das nid lah entgah u hei üs prompt ufä Wäg dert härä gmacht 😃. Chum abgfahrä si mir aber grad id Polizeikontrollä cho, wo dr Christian het müessä blasä 🫣 (Nid wüu är komisch gfahrä oder bsoffä überächo isch, sondern hiä isches standard 😉). Da aber aues sowiit guet gsi isch, hei mir chönnä wiiterfahrä. U churz vorem Ziu tschaupet üs genau einä vou vor z Outo, zum Glück het dr Christian nu mögä brämsä 😑.

Dr Markt säuber isch viu grösser gsi aus dä geschter, het aber o entsprächend viu meh Schrott gha. Mir si wieder Koreanischi Pancakes gsi gah holä, wo wieder mega fein gsi si 😋

När si mir wiiter iz Cataract Gorge Reserve, wo mir ä chliini Wanderig si gah machä. Mir hei eini mitem Schwärägrad "Hard" usägläsä, aber sträng isches wieder nid würk gsi 🤷🏼‍♀️. Drfür hei mir grad 2 Echidnas, mega viu Pfauä mit Jungä, äs Wallaby u sogar nu ä Pinguin 🐧 gseh gha 😅.

Wieder zrüg ir Ungerkunft hei mir wieder bsuech vomänä chliinä Wallaby becho. O das isch zum Teil mega nach a üs härä cho, mega härzig 🥰.Read more