112 & 113: Motueka & Pūponga

Noch dere agnähme Fahrpause eschs i üsem rollende Dehei weder of d'Stross gange. D'Route esch wiiter entlang de ruuche Westküschte Rechtig Norde gange. Üses schwachbröschtige Gfährt hed met de Aastieg jewiils zemmli z'kämpfe gha ond Gschwendigkeitsverlöscht vo 40 km/h (vo 80km/h of 40km/h abe) send kei Sälteheit gsi. Üse alti Corsa hed üs aber glehrt, i so Momänt Glasseheit z'bewahre ond so send vel Uswiichstelle gnötzt worde, zom de ufghaltnig Verchehr verbii loh. För dä Tag hemmer eh nüüt Bestemmts plant gha, drom hemmer üs chönne Ziit loh.
In Westport hemmer üsi Vorröt weder ufgstockt, bevors vo de Küschte is Landesinneri gange esch. S'Ziel vo de höttige Fahrt esch es Freedom Camping in Motueka gsi. I de Kommentär of de App Campermate heds nocheme beliebte Platz tönt ond so hemmer einigermasse be Ziite welle dete sii. Us dem Grond (ond au, wels tatsächlech au ned vel anderi Grönd gäh hed zom ahalte), hemmer of öberflössigi Pausene verzechtet ond send scho am früehche Nomittag a üsem Ziel acho. Ond zwor genau rechtig: Zwoi Plätz heds no gha, chorz noch üs esch de letschti Platz de au wäg gsi. Mer hend üsi Campingstüehl, d'E-Reader ond de Sandfly-Spray iipackt ond send före a Strand. De Spray hemmer zom Glöck ned bruucht, de (sehr) starchi Wind hed üs die Plagegeischter vom Liib bhalte. Leider esch das aber au de einzig Vorteil gsi. Nochdems au diräkt am Bode ned agnähmer gsi esch zom läse ond mer au es Höngerli gschpört hend, semmer noch öppe 20 Minute weder zrogg zom Büssli ond hend üs es warms z'Vieri gönnt.
Chli spöter semmer of Wattspaziergang gange ond hend debii allerhand spannendi Moschle, Vögel ond onidentifizierbari (Läbe?)Wäse agluegt. De Kiter hemmer au no chli zuegluegt, bevor mer weder Rechtig Ufer zrogg send. Was mer bsonders cool gfonde hend: Am Ufer esch en Meerwasserpool gsi, wos ermöglecht, dass Lüüt au be Ebbe (oder Storm...) gmüetlech ehri Bahne chönd zieh.
Bem Znachtchoche ond -ässe send of de Suechi nocheme Stellplatz emmer weder neui Campervans cho ond erfolglos gange. Met enere absolut ongrächtfertigte Öberheblechkeit (mer hend üse Platz schliesslech met vel Glöck ond zuegäh, chli Ziitplanig, becho) hemmer ab dene nor chönne de Chopf schöttle: "Meined die ärnschthaft, dass om die Ziit no en Platz do bechömed?! Pfff.. " Jo, s'Läbe im Camper hed üs (ok, nor d'Jasi) i gwössne Pönkt älter wärde loh.

Am nöchschte Tag hemmer üs zom vorussechtlech nördlechschte Ponkt vo üsere Neuseelandtour begäh, de Golden Bay, gnauer noch Pūponga. Onderwägs hemmer es chliises Kommunikationsproblem onderenand gha, was chli för schlächti Stemmig gsorgt hed. Chond halt au mol vor.
De erschti Stopp esch bemene Ussechtsponkt gsi, wo leider meh versproche hed, als dass er hed chönne halte. Nochhär semmer diräkt bes ofe Parkplatz vom Triangle Flat, em Usgangsponkt vo üsem plante Strandspaziergang. De erschti Teil esch öber ca. 4 km a de Innesiite vonere sichelförmige Landzonge gange. Schön, aber ned sehr spannend, hed sech rächt zoge. Denn hed de Wäg öber spektakuläri Düne gfüehrt, wo eim s'Gfühl gäh hend, ofeme Wüeschteplanet glandet z'sii. Of de Ossesiite vo de Halbinsle esch de Wind zemmli starch gsi ond vor allem onablässig. De Wüeschteplanet hed do sini herti Siite zeigt ond mer send met düütlech meh Müeh als no bem Hiiwäg weder Rechtig Parkplatz gloffe. De Dani hed sogar onfreiwellig es Wettrenne gäge Wind mösse mache, wonem es Papierli us de Hand gheit esch. Onderwägs hemmer no en tote Wal ond en tote Chogelfisch gfonde. Mer hends zom Glöck läbig zrogg zom Büssli gschaft ond üse Platz imene Camping bezoge.
Am Obig semmer no a Wharariki Beach före Sonneondergang. Obwohl mer of üsere Reis scho sehr vel Sonneondergäng gseh hend, esch das wohl eine vo de schönschte gsi. Gar ned mol so sehr wäg de Sonne, sondern wägem Strand: Iidröcklechi Felse ond Felsböge im orange Liecht, Seehondwälpe bem Spele, d'Wiiti vom Strand... all das heds eifach sehr speziell gmacht. Zrogg bem Camping hemmer no gmeint, mer heiged es Rieseglöck, wel mer gmeint hend, Kiwis z'gseh. Im Liecht vo de Stirnlampe hend sech die "Kiwis" aber als Wekas usegstellt, was de scho nömm so ufregend gsi esch.もっと詳しく