Tag 124 - 126: Buenos Aires

De erschti rechtig Tag in BA hed chli harzig agfange. Obwohl mer geschter todmüed is Bett gheit send, semmer, Jetlag sei Dank, am Morge am 20 ab eis scho weder hellwach im Bett gläge. De Dani hed versuecht dör Läse weder müed z'wärde. Bes mer weder iigschlofe send, eschs wohl öppe vieri bis füüfi worde ond de noch paar wenige Stond weder ufstoh goht halt ame chli sträng.
Als erschts semmer mol go Gäld wächsle. Trotz üsem Motto (siehe 13.02.) hemmer gliich ned traut be de sog. Arbilleros of de Stross s'Gäld z'wächsle ond send ine inoffiziell-aber-erlaubti Wächselstobe, wo mer för 200 USD es dicks Böndel a Pesos becho hend.
Zom üs mol es erschts Beld vo de Stadt mache, semmer eifach mol losgloffe. So ziellos omenand laufe hemmer aber gliich ned so guet gfonde ond hend üs paar sehenswärti Ziel usepickt, wo denn indiräkt agloffe worde send.
Zerscht semmer d'Galerías Pacifico go aluege, es Iichaufszentrum imene Gebäude us 1889, wo nochem Vorbeld vo de Galleria Vittorio Emmanuele II in Mailand baut worde esch. Wiiter semmer zom Operehuus ond vo det us zom Regierigsgebäude. Onderwägs natürlech vel Interessants gseh, leider aber au do Azeiche vo Armuet.

Am Samschtigmorge hemmer no vel meh Müeh gha met ufstoh. Am 10.15 hemmers i z'Morge-Ruum gschafft, wo mer feschtgstellt hend, dass anderi offebar au gärn länger schlofed.
S'Ziel för de höttig Tag esch San Telmo gsi, s'ältischte Quartier vo BA. Im Mercado de San Telmo vo 1897 heds vel z'gseh gäh, onder anderem au s'Resti "Je suis raclette". Of Fondue oder Raclette hemmer aber de doch ned so Loscht gha.
Ofem Plaza Dorrego heds en chliine Märt gha, wo mer au allerhand schöni Sache hätt chönne poschte, aber äbe, de Platz im Rocksack esch leider knapp...
Nochdem mer imene chliine Kafi öppis tronke hend ond üs sehr öber d'Freud vo de Chällnerin a üsne lausige Spanischversüech gfreut hend, semmer weder zrogg Rechtig Hotel ond send debii anere Demo be de Plaza de Mayo verbii cho. Scho die zwoit set mer do send...
Die ehnder onschiinbari Kathedrale hemmer au no schnell vo enne beguetachtet ond send nomol is Hotel, bevor mer weder send go koreanisch ässe wie am erschte Obig. Esch halt fein gsi.

S'beshär erfolglose Onderfange, en ÖV-Charte z'chaufe (entweder send d'Schalter zue gsi oder sie hend sie ned verchauft), hemmer am Sonntigmorge no chönne met halbem Erfolg abschliesse. Aschliessend semmer Rechtig Oschte spaziert, wo mer is Hafegebiet Puerto Madero chond ond send vo det us via San Telmo zrogg zo de Galerías Pacifico, wo mer no es Mitbringsel för üsi Gaschtfamiliene hend welle organisiere. Wo mer üs det gägesiitig vo üsne Spanischonkänntnis vorgjammeret hend, hemmer gmerkt, dass mer gar nie en Link för de Online-Iistufigstescht becho hend ond drom morn scho of die achti mönd i de Schuel sii. Naja, wenigschtens no rächtziitig gmerkt.
Wel mer zemlech i de Nöchi vonenand bi de Gastfamelie wohned, hemmer grad zäme ofe Bus chönne goh. Es nätts Pärli hed sech wohl dänkt "Die arme Tourischte met ehrne grosse Rocksäck hend secher kei Plan, wos döre mönd - dene hälfemer jetz!" Leider hends eifach Spanisch met üs gredt ond sälber offebar no weniger als mer gwösst, wo ond wodöre as de Bus fahrt. De Bus Nr. 152 esch genau wie vo üs erwartet cho ond mer send dankend iigstege. Paar Statione wiiter hemmer de mösse "Tschüss" säge - d'Jasi esch zo ehrere Gaschtmuetter Gloria gange, de Dani hed sech zom Marcelo ond de Cecilia ufgmacht.Read more