Full Throttle Pt.1

Im Tsitsikamma NP gaht mer offebar ga schlafe wenns dunkel wird, somit sind mer hüt scho relativ früeh uf gsi. Dementsprechend hemmer hüt au vil ufem Programm gha: zerscht de Storms River Mouth Hike (en churzi Wanderig zumene Lookout im Tsitsikamma) und denn Ziplining über Wasserfäll, mit bis zu 211m Talüberquerig. Vumene andere Pärli det hemmer denn de Gheimtipp becho, in Kragga Kamma Game Park zga. Churz nach de 3 simmer det acho und hend eigentlich nid bsunders vil erwartet...doch scho nach 20m im Park hemmer die erschte Zebras, Antilope und Strüss gseh. Bizli wiiter sind nu Giraffe, Büffel und Wildsäü derzue cho. Die grösst Überraschig isch aber es Rhinozeros mit Baby gsi, das het hinder enere Kurve grad so uf üs gwartet... nid emal 10m vum Auto entfernt! Da hemmer scho grad zimli Respekt gha und hend die Familie nid lang welle störe... doch scho gli hemmer gmerkt, as die Tier sich offebar durch es paar Mänschli im Auto nid lend la beidrucke... d Zebras und Wildsäü sind eus regelrecht im Weg gstande und hend gar nid vu dr Strass drab welle... und das ganze Erlebnis het grad mal 90 Rand, also 7.30 CHF pro Person choschtet :o etz mend aber die türe Private Reserve und Krüger NP was zbiete ha! Zum Tagesabschluss simmer nu uf Addo gfahre, morn gahts in Addo Elephant Park :)Read more