Satellite
  • Day 26

    Self Driving Day in Kruger NP Pt.1

    May 14, 2018 in South Africa ⋅ 🌙 22 °C

    De hütig Tag het für eusi Verhältnis scho früeh agfange: churz nach de 7ni simmer usem Berg-en-Dal Camp los. Doch ufem Parkplatz simmer scho eis vu de letschte Autos gsi, zum eus richtig z assimiliere memmer wohl nu früener uf...
    De Süde vum Kruger isch eher dicht mit Büsch und chline Bäum bewachse, derfür simmer mit vilne Game Sightings us nöchster Nöchi belohnt worde: vil Elefante, Giraffe, Zebras, es paar Rhinos und Herdewis Impalas. Wos i dr Amakhala Game Reserve nu so vil Warthogs gä het, hets hie derfür 150'000 Impalas! Hinder jeder Kurve staht wieder en Herde oder isch grad am d Strass überquere...
    Wenn mer so de ganz Tag in Busch starrt, gseht plötzlich jede Struch, umgheit Baum oder Stei wienes Tier us... 1'001 hemmer vu dene gseh :) Doch wenn immer mer en Auto-Asammlig gseht, weiss mer, ases da was Interessants zgseh git. So hemmer hüt au zwei Cheetas vu Wiitem und sogar drü Wild Dogs, vu dene gits im ganze fascht 20'000 Quadratkilometer grosse Park nur 120 Stück git, gseh! Doch die vile Bsuecher hend au en Nachteil, so hemmer zum Bispil en chline Stau gha, wel sechs Rhinos uf dr Strass gstande sind...
    Wiiter nördlich wird de Krüger offener und mer gseht wiiter id Savanne, doch leider het eus da s Wetter en Strich durch d Rechnig gmacht. Am Morge isch nur liecht bewölkt gsi, ideal zum Tier gseh wel eim d Sunne nid blendet unds im Auto nid so heiss wird. Doch churz vor Sunneundergang simmer regelrecht verschiffet worde! Trotz schlechter Sicht hemmer doch nu Elefante bim Schlammbad und en Flusspferd-Familie bim Spile derfe beobachte.
    Churz vor Gate Closure simmer bim Satara Camp acho und hend eus uf en heissi Duschi gfreut - doch leider isch eusi Reservation i dr Zwüschezit storniert worde... und das imene usbuechte Camp! Zum Glück hends denn doch nu irgendwie es freis Bungalow gfunde und so stellemer eus uf en gmütliche Abig mit Pizza und Rotwii i.
    Read more