Epic Night Game Drive Pt.1

Die hütige 2 Stund nach Sunneundergang hend alles toppt womer bis etz in Südafrika erlebt hend! Doch mal langsam vu vorne:
Hüt Morge simmer wieder mal früeh uf, es paar Rice Crispies am Morge am 6i und denn los zu eusem letschte halbe Tag Self Driving im Kruger NP. Grad am Afang hemmer Gnus (btw s gliche wie Blue Wildebeests), Giraffe und en Elefante-Herde gseh, doch nachher hemmer während 3 Stund meh oder weniger Nix meh gseh... abgseh natürlich vu Impalas alias Everywhere Animals... derfür hemmer eus mal uf anders gachtet, wie zum Bispil uf Schwärm an chline Vögel, Liechter, Stimmig und die unglaubliche Gschmäcker nachem gestrige Rege.
Gege Mittag hemmer denn de öffentlich Teil vum Kruger verlah und sind in Timbavati Game Reserve gfahre, en private Teil vum Kruger. Als Underkunft hemmer da d Umlani Bushlodge gwählt, bewusst ganz en andere Stil Lodge als HillsNek im Amakhala. Umlani het sich zum Ziel gsetzt, de Bsuecher en möglichst authentisches Bush-Erlebnis zvermittle - d.h. das Camp het weder Umzünige no Strom. De Kaffee wird überem Füür kocht, mer wird mit Trummle zum Esse gruefe und en Ranger begleitet eim am Abig ind Bungalows, wel mer nie weiss was für Fiecher im Camp am umelaufe sind...
Euse erschte Game Drive hüt Abig isch tatsächlich ganz anderscht als im Amakhala gsi. De Sämy beschribts als Verglich zwüschet schwitzer Bünzligkeit und russischer Grobschlächtigkeit - sowohl im Guete wie im Schlechte. Wo mer im Amakhala nu Ewigkeite voller Respekt zur Natur uf dr Dirt Road uf Reaktione vu Tier gwartet hend, ohni jegliche Ifluss znä, so fahrt mer hie mim drütonnige Jeep quer dure Busch, über alles wo im Weg staht... bim einte Mal hemmer sogar ufbockt! Bis etz hemmer dänkt das sig nur mit eusem Corolla möglich...
Jedefalls simmer zu dem Evening Drive ufbroche, 5 Gäst us Kapstadt, wo all scho erfahrni Safari-Gänger sind, euse Ranger Oliver und euse Tracker Cabinet, wo ganz vorne uf dr Huube vum Jeep sitzt und nur fürs Ufspüre vu Tier zueständig isch. Zu Beginn hemmer wieder vil Elefante gseh, drunder eine mit de grösste Stosszähnd so far. Dernach hemmer lang nix meh gseh, was am Sämy sini Schmach vum Morge scho biz het glinderet. Bi Sunneundergang hemmer für en Sundowner Halt gmacht und de plötzlich isches losgange. Zerscht hemmer en Hyäne gseh anere Färte folge und denn isches Vollgas durch de Busch gange. Mer sind am Funkspruch vu anderne Rangers gfolgt und hend da Unglaublichs gseh: 7 jungi Löwe am Fuulenze. Die 6 Männli hend all nu kei rächti Mähne gha, die bechemeds erscht wenns ca. 2 jährig sind. Btw, je schwärzer d Mähne, desto mehr Testosteron het de Leu. Die Leue hemmer relativ lang chenne alei beobachte, teilwis nur us es paar Meter Distanz. Interesting Fact: Leue sind eis vu de wenige Tier womer mimne Schinwerfer azünde chan, ohni as si sich gstört vorchemed... offebar isch ihres Aug speziell ufbaut. So grossi Gruppe an junge Männli het au de Ranger erscht selte gseh, und wo si ufeme Bäumli umeturnt hend, het au er nur nu gstuunt.
Nach dem Sighting simmer überglücklich gsi und hend gar nüm gross vum Rückweg erwartet. Doch prompt hemmer en relativ seltli African Wildcat gseh verbihusche. Und denn isch de negschtt Funkspruch cho und mier sind im Stockdunkle wiiter in Busch vorgfahre. Det hemmer tatsächlich nu en grossgwachse, männliche Leopard derfe erspähe, de letschti vu de Big 5 wo eus nu gfehlt het! Mer sind ihm sicher en halbe Kilometer über Stock und Stei quer durch de Busch gfolgt... bis mer ebe ufbockt hend...
Doch au da isch euses Glück nu nid z End gsi, ufem Rückweg hemmer numal en Hyäne gseh (resp. fascht überfahre) und en Genet (dt. "Ginsterkatze") gseh, es chlines tupfts Chatze-ähnlichs Tier wo euse Tracker grad mal gschnell usem Augewinkel entdeckt het.
Überglücklich simmer nach guet 4 Stund zrugg i dr Lodge acho, hend fein Znacht gesse und de jungi Lodge-Manager Greg kenneglernt. Etz ligemer grad im Moskito-Himmelbett und losed de nächtliche Grüsch vum Busch zue.Read more