Safari in Udawalawa NP Pt.1

Hüt Morge simmer churz nach de 5i grad vu mehrerem gweckt worde: vum Vogelzwitschere, Hahnkrähe und buddhistische und muslimische Gebet... churz später simmer zunere Safari im Udawalawa NP ufbroche. Leider dismal nid imene Toyota Land Cruiser wie in Südafrika, sondern imene Jeep vu Tata... dSitz hend zwar ganz bequem usgseh, weich polstered, doch derfür isch das Auto überhaupt nid gfederet gsi... jedi unsichtbari Bodewelle het mer gspürt, geschweige denn all die durchweichte 4x4 Route im NP... hoffemer mal as TCS BaNCS sich besser bewährt.
Mer hend hüt sowohl mim Wetter als au mit de Tier Glück gha: am Morge het zum erschte Mal dSunne gschine und mer hend Wasserbüffel, Süesswasserkrokodil und zum Schluss nu einigi (indischi) Elefante gseh. S "Everywhere Animal" vu Sri Lanka sind Pfaue, wo btw miaued... zumindescht tönts nach "Miauuu" wenn si enand rüefed :)
Am Mittag het eus de Sanat, Vater vu Madhu, eusem Fahrer vu geschter, abgholt. Er wird eus die negschte 10 Täg durch Sri Lanka fahre und berate. Mit ihm simmer zerscht uf Buduruwagala ga uralti in Stei gmeisselti Buddhas ga aluege und denn zu de Bambarakanda Falls. Dernach en schmali Passstrass deruf uf Haputale uf 1'400m, durch sehr grüeni, Nebel-verhangni Wälder und an Tee Plantagene verbi. Endlich mal en Tag womer dank schönerem Wetter chli was hend chenne undernä!*Read more