Sick of all the rain

Am 5i am Morge hemmer scho wieder kei Strom gha... trotzdem simmer denn scho uf um ufe Little Adams Peak zlaufe zum de Sunneufgang ga zluege. Es isch am Morge so füecht gsi, asmer d Wasserpartikel i dr Luft het chenne gseh... Nachdem eus Google (wieder Mal) verirrt het, hemmers meh oder weniger pünktlich zum Sunneufgang ufe Hoger gschafft... doch das het eh kei Rolle gspilt, wel mer vor luuter Wulche und Nebel nid vil vu dem Füürball gseh het...
Nachem Zmorge simmer mim Zug vu Ella uf Nanu Oya gfahre. De Zug selber isch ganz guet, die erscht vu drü Klasse chunnt eusne Züg ganz nöch - aber s eigentliche Highlight vu dere 3h Fahrt sind dZugstürene gsi, wo während de Fahrt eifach offe blibe sind. So sind v.a. fürd Westler d Stehplätz zwüschet de Wäge die wahr Erstklass gsi, nid die reservierte Plätz im Wage.
Euse treu Fahrer Sanat het eus denn vum Bahnhof abgholt und ind Teefabrik Dambo Labookellie gfahre. Die isch chli chliner als die vu Lipton, aber mit bizli meh Chunde-Liebi ufbaut. So hemmer etz au direkt chenne die reine Teesorte probiere und die Bezeichnigs-Rätsel chenne uflöse (wie BOP, Broken Orange Pekoe, OP und White Tea). Je fiiner (also chliner gschnitte) dBlätter, desto stärcher de Tee - und desto eher trinkt mer ne mit Milch und Zucker (wie Fannings oder Dust). Zudem hemmer glernt, as mer Teepflanze bis zu 50 Jahr cha nutze und sie nur all 5 Jahr muess stutze.
Dernach simmer uf Nuwara Eliya is Grand Hotel gfahre, zum High Tea mit Häppchen gniesse. Da in Nuwara Eliya gits ganz vil Hotels, doch hemmer eus als Entschädigung für de ewig Nieselrege chli was bessers gleischtet. Sind zwar scho zimlichi Schlitzohre: zerscht hends 95 USD pro Zimmer welle, doch womer ihne de Pris vu 45 USD uf Booking.com zeigt hend, sinds denn schnell mit de Prisvorstellige obe abe cho... und de Sanat het denn plötzlich derfe gratis übernachte...
Alles in allem gfallt eus Sri Lanka sehr, doch langsam hemmer de Räge zünftig satt. Mer hend gwüsst ases de Anfang vu de Monsunzit isch, aber so vil Rege isch wohl au fürd Regezit eher unüblich... mer hoffed sehr, as sich das wiiter im Nordoste änderet.*Read more