Sigiriya Lion Rock & Nilaveli Pt.1

Hüt Znacht hemmer wieder mal dDifferenze in euser Beziehig bemerkt... während de Sämy abdeckt und usbreitet gschlafe het, isch dMartina bis zu de Ohre mim Lintuech zuedeckt gsi und het gege Mugge kämpft... und verlore :( völlig verstoche isch sie am Morge ufgwacht, während de Sämy nid ei einzige Stich abbecho het... unfairi Welt! De Sämy isch ganz ungläubig aser doch nu en grössere Mugge-Magnet als sich selber gfunde het...
Nu vorem Zmorge simmer zum Sigiriya Lion Rock ufbroche, en Felsbrocke mit Felsmalereie und Tempel-/Festigs-/Palast-Ruine ufem Gipfel. Es wär es Schlaraffeland für de Indiana Jones! Det ane füehred fascht 2'000 schwindelerregendi Stei- und Stahl-Stufe... peitscht vumene sehr starche Wind. Dobe ufem Gipfel hemmer sicher über 100km/h gha, de Sämy het sich sogar gege Wind chenne lehne!
Dernach simmer wiiter in Norde gfahre und hend euses Mittagspfüsi im Auto ghalte. Plötzlich werdemer gweckt und vor eus staht sMilitär! Doch was wienen Strasse-Blockade usgseh het, isch nur en Wiederholig vu geschter gsi. DSoldate hend dAutos aghalte und uf Wunsch Chrütertee (was ja streng gno nid Tee isch) verteilt... ganz ungwohnt!
Etz simmer in Nilaveli acho und es isch herrlich warm und schön! Nachdem mer die letschte paar Nächt in teilwis chli zwifelhafte Pensione übernachtet hend, hemmer eus etz chli meh Luxus gleischtet und sind imene chline Boutique Hotel mit nur 6 Zimmer. SHotel lit direkt am ruhige, 30 Grad warme Meer, mit perfekte chline Welle. Uf das hemmer lang planget!*Read more