Aquarium Diving

Hüt isch sTauche scho inere ganz andere Liga gsi. Alei scho die 45min Fahrt inere Nussschale isch es Erlebnis gsi! Guet underhalte simmer au gsi, mer hend eusem chinesische Instructor welle "What shall we do with the drunken sailor" biibringe, allerdings isch de Satz "shave his belly with a rusty razor" wohl chli zvill gsi... Zudem simmer all 2-3sek vunere Welle durchnässt worde, so asmer trotz de Hitz schön früsch vorem Hafe vu Trincomalee acho sind. Det staht usse ufeme höche Felse en Hindu Tempel. Vor einiger Zit hets da en grössere Brand gä und dMönche hend einigi Statue überd Klippe ins Meer grüert um sie vorem Für zrette. Die Statue chamer etz uf ca. 10m Tiefi bewundere, einigi Taucher leged au Münze vor sie ane. Mer hend da vil meh Lebe als bi de Tauchgäng geschter gseh, vil überwachsni Felse in allne Farbe, Fischschwärm, Muräne und sogar es paar Baby Lionfish.
De zweit Tauchgang hemmer bi dr Navy Island gmacht, vu obe rächt unschinbari Felse. Doch under Wasser öffnet sich eim Felslandschafte, mit chline Höhle und tauchbare Durchgäng, Korridor und Riffwänd. Leider hemmer au en chinesische Tollpatsch derbi gha: 5sek nachdem sie in die glasklar Höhli taucht isch, sind all Fisch vertribe gsi und mer het nur nu ufgwirbelte Sand gseh...trotzdem sehr en schöne Tauchgang gsi, fascht scho Aquarium-Feeling!
Später simmer numal an Strand, wo de Fredi sini Uno-Niederlag-bedingti 50-PushUp-Challenge im Sand absolviert het. Zwar Taucherli-like, mim Steissbein in der Höh, aber sehr tapfer! :)*Read more