Wreck Diving

Eusi letschte beide Tauchgäng in Sri Lanka sind numal super gsi! Am Morge simmer zerscht zum Wrack vu dr Irarakandy, en Dampfer wo 1858 versunke isch. Das 60m lange Schiff het Gold und Sklave us Südindie glade gha und het en Flussmündig mit dr Bucht vu Trincomalee verwechslet. Da isches uf es chlises Riff ufgloffe und lit etz usghöhlt und halbiert uf 10m Tiefi. Nid nur de halb vergrabnig 4m Propeller und de relativ guet erhaltnig Boiler sind sehr idrücklich gsi, au die Unmenge an Fischschwärm und farbige Koralle sind sensationell gsi. Ussert de Martina hend sich all um es Selfie mimne grosse Pufferfisch grisse - sie het meh Freud anere junge Barracuda School gha.
De zweit Rifftauchgang isch au sehr entspannt gsi. SHighlight fürd Martina isch en Golder Pilot Jack Fish gsi, en knallgelbe chline Fisch mit schwarze Zebrastreife, wo sie es paar Minute umchreist het. Bi zu 15cm vord Maske ischer anegschwumme, denn richtig Bei abtaucht, dFlosse umrundet und wieder ufecho. Offebar sind es paar vu de Meeresbewohner glich fasziniert vu eus wie mier vu ihne :)
Nachem Tauche simmer wiiter uf Anuradhapura, en grösseri Stadt im Landesinnere, wo v.a. für ihri Tempelruine bekannt isch.Read more