40 knots of wind!

Bis etz hemmer jede Tag tiptop Wind gha - aber hüt hets eus fascht wegblase! DBöe sind bis zu 40 Knote starch gsi, also knapp 75 km/h... übere Mittag isches am heftigste gsi, da het mer nur nu Pros und Instructors uf dr Lagune gseh. De Linus, de dütschi Kitemeistet bi eus im Camp, isch mal gschnell über die ganz Sandbank gsprunge, über 15m höch! DMartina isch grad de Sämy im Wasser am fötele gsi (leider mit Zink-Filter :() da isch de Linus full power uf sie zuegfahre und easy über sie drübergumpet :)
Später het de Wind chli nacheglah, denn simmer numal mit chlinere Kites ufs Wasser... a dr Martina het sogar en depowerete 5qm Kite glanget!
Zrugg im Camp hemmer im Pool entspannt und eine vu de Hünd usem Beachvolleyball-Netz befreit: sie het sich festbisse gha und sich um die eignig Achse verdreiht, so as sNetz schmerzhaft is Zahnfleisch gnitte het und sie nüm alei freicho isch. Durch sGebell vu de andere Hünd simmer druf ufmerksam worde und hend dHündin mit vereinigte Chräft befreit. Sie isch derna überglücklich gsi, het eus Pfote und Schnauze ufd Füess gleit, als ob sie sich hätt welle mänschlich bedanke :)
Am Abig hemmer eusi wiit-transportierti Rose us Südafrika trunke und bi Cherzeliecht UNO gspilt (da wieder mal Stromusfall...)Read more