Party, pedicure & MMA

Geschter Abig simmer nu mit Kolege vu Fabi & Blanca ga Znachtesse, ins Resti vu dene Kolege (hie het jede sis eigete Business...) Nebed super Esse (btw brucheds hie Jackfruit als Fleischersatz) und paar Bier hemmer da au Kraton gha, en Art Wundertee wo nur nu in Indonesie legal isch... es sell usglichend, Kreativitäts-fördernd, und weis nid was suscht nu si... mier hend uf jede Fall nix gmerkt :)
Nachem Znacht simmer denn nu wiiter in Usgang... und hend nid schlecht gstuuned womer plötzlich de Heiko vum PF Account entdeckt hend! DWelt isch doch tatsächlich es Dorf :) dParty isch recht cool gsi, gueti Musik und vil People Watching - erscht uf die halbi 4ri simmer denn hei, wo denn au scho vorbstellti Burger uf eus gwarted hend :) thx Fabi!
Dernach hemmer komatös bis hüt nachem Mittag gschlafe, einzig de Hunger het eus denn mal usem Bett usetribe. Nacheme feine Zmorge inkl. Instagram-Fotoshooting sind dBlanca und dMartina ind Pedicure, während sich dJungs ufd Couch zumene Film verzoge hend.
Später nu and Canggu Fight Night vumene lokale MMA Camp, es het Kämpf in Jiu Jitsu, Boxe und Muay Thai zgseh gä. Agfange hets ganz harmlos mit de Chind, denn sind dTouris dracho und denn sind dProfis dra gsi. SHighlight isch en mixed double Muay Thai Fight gsi, wo es Neuseeländer Pärli gege es Dütsch-Indo Pärli atrete isch - si hend jewils selber chenne entscheide, wer wenn igwechslet wird. All Kämpf sind sehr idrücklich gsi, teilwis recht heftigi Schläg, aber au sehr prägt vu Sportlichkeit und Kameradschaft, die meischte Kämpfer sind sich nachem Fight ind Arme gfalle :)Read more