Rice Paddies & Monkey Forest Pt.1

Geschter simmer nacheme Balinesische Curry vu Frösch in allne Tonlage in Schlaf quakt worde. Am Morge sind dFrösch denn vu Grille & Zikade abglöst worde :)
Überpünktlich hemmer euses vorbstellte Zmorge serviert becho - direkt bi eus uf dr Zimmer-Terrasse! Dernach hemmer eus en Stund Yoga gönnt, mit Blick ufd Riisfelder, Räucherstäbli-Duft und Stretching Tortur füre Sämy... was für en tolle Start in Tag!
Guet gnährt und gedehnt simmer mim Roller in Norde, chrütz und quer durchd Riisfelder und hend ab de vile chline alte Tempel am Strasserand gstuunt. Denn simmer um die eint Kurve kehrt... und plötzlich isch eus en langi Prozession mit wiss gekleidete Balinese (Hindus?) entgegecho! Sicher mehreri hundert Lüt sind mit Opfergabe und Drachefigure an eus verbi zoge. Leider hemmer nid usegfunde um was für en Fiir es sich handelt, somit simmer Kultur-banausig wiiter gfahre.
Am Mittag simmer wiiter in Süde, in Monkey Forest. Das isch es Stück Urwald am Rand vu Ubud mit diverse Tempel und vilne freilaufende Affe. Het eus sehr ans Dschungelbuech erinneret :)
Später hemmer dänkt mer nehmed en andere Rückweg ins Hotel - mal ei Parallelstrass wiiter um am ganze Vercher uszwiiche. Was uf Google wienen breiti, für Autos befahrbari Strass usgseh het, het sich als knapp 1m breiti, gwundni Gass usegstellt... zerscht durch snördliche Ubud, denn durch Riisfelder, an Yoga Studios, Art Ateliers und Cafes verbi. SSträssli isch je länger je schmäler worde, am Schluss hemmer nur nu en ustrampelte, ca. 20cm breite Feldweg gha... all andere Westler hetmer scho längstens nur zFuess gseh! Fürd Balinese aber offebar keis Problem, au Chrüze uf mit Gräbe gsäumte Wegli gaht tiptop. Am Endi vu dr Strass simmer denn ganz nöch vu eusem Hotel usecho - bim zruggluege hättemer nid dänkt as das Wegli mim Roller befahrbar wär! :D
Nachem Znacht hend eus exotischi Kläng in Ubud Palace glockt. Da sind ca. 20 Mönche (?) an Trummle und Glocke üebe gsi, herrlichi Melodie!*Read more