Ahoi Moana!

Hüt Morge simmer churz nach de 4i uf, um "rechtzitig" zu eusem Flug am halbi 8i nach Labuan Bajo in Denpasar zsi... doch die Strecki, wo bi verstopfte Strasse bis zu 2h duured, het hüt Morge grad mal 20min brucht! Somit simmer sogar fürd Martina ihri Verhältnis viiil zfrüeh am Flughafe gsi :) vu det simmer 1.5h mimne Turbopropeller uf Labuan Bajo, Flores, gfloge. Öppe glich chli wie das 80 Persone Flugzüg isch au de Flughafe in Labuan Bajo gsi - grad mal en grossi Halle, suscht nix :)
Uf Flores simmer denn direkt zum Hafe uf euses Liveaboard Moana gfahre worde, es 17-jährigs traditionells Holzschiff mit grad mal 8 Gäst - derfür mit 14 Crew-Mitglieder! Die negschte paar Täg werded vu eat-dive-sleep-repeat prägt si, mer tauched bis zu 4x pro Tag.
Hüt Nami isches denn au scho losgange mim erschte Ischätzigs-Tauchgang - aber scho nur das Plätzli isch super gsi! Dicht und bunt bewachsni Felsblöck mit vil Lebe derzwüschet: unzähligi Fisch, sigs alei oder in Schwärm, und Koralle wo usgsehnd wie Blueme in gelb, blau und rot - wunderschön! Zudem hemmer mehreri blue-spotted Stingrays gseh, en Sepia (ganz elegant ufeme Koralleblock, mit usgstreckte Tentakel und walleds "Gwand"), en grau-schwarze Tintefisch (wo all paar Sekunde dFarbschattierig gänderet het), en Shrimp und farbefrohi Nacktschnecke.
Etz ligemer inere Wind-gschützte Bucht vor Anker, im Blickfeld vu unzählige eus unbekannte Inseli und losed Piratelieder zum Sunneundergang. Schint ganz en gueti Truppe zsi, mit eus drü jungi Pärli und eis älters Föteli-verruckts Ehepaar.*Read more