Wae Rebo

Es het die ganz Nacht gschüttet! Fascht wie wenn öpper ufem Dach würd stah und chesselwis Wasser würd usleere... und wos ufghört het regne, het sFroschkonzert agfange :) mier sind eus etz eher Welle- und Windruusche gwöhnt!
Nachem Zmorge het eus de Nofar, de Neffe vum Lodge-Bsitzer, zämä mit de UK Touris Helen und Shane uf Wae Rebo gfüehrt. Das traditionelle Dorf chamer nur zFuess erreiche, durch en ca. 3h Wanderig de Dschungel deruf. Nachem nächtliche Rege isch der Weg sehr verschlammt gsi, so hemmer euses Morgesport-Pensum meh als erfüllt :) unglaublich as die meischte Dorfbewohner der Weg mindischtens einisch pro Tag deruf und derab gend! Dobe wird v.a. Kaffee gerntet, alles andere, also au jedes Chörnli Riis, mues mit Muskelchraft (und meischtens barfuess!) zum Dorf ufetreit werde.
Wae Rebo lit zwüschet dicht bewachsne Berge und es schwebed immer wieder Nebelschwade verbi. De traditionell Teil bestaht us 7 grosse, konische Palmwedel-Hütte, mit je bis zu 5 (!) Stöck. Grad bim Acho im Dorf wird mer im Main House vu einem vu de Dorfältische begrüesst. Für en chlini Spend bittet er denn dAhne, uf eus Touriste ufzpasse und mer wird so ind Gsellschaft vu Wae Rebo ufgno. Dernach simmer vu eusem Gastgeber Michael im traditionelle Guest House empfange worde. Er het eus erchlärt, as hie alles sehr zentralistisch usgrichtet isch, nid nur dSpiderweb Rice Paddies und die traditionelle Hüser. Die ganz Kultur wiederspiegelt das, d.h. zum Bispil wenn öpper es Problem het oder was passiert isch, denn gaht mer zum Main House, zu de Village Elders, zum sProblem zämä und in Harmonie zlöse. Familie zählt hie über alles. Interessanterwis derfed aber dFamiliene im Dorf nid underenand hürate - de Partner mues useme andere Dorf cho.
Binere Tasse Arabica Kaffee us dr Umgebig hemmer denn au nu chli meh Bahasa Indonesia glernt, da es chlises Wörterbuech vu was mer bis etz ufgschnappt hend:
teri makasi = danke, suma suma = gern gscheh,
slamat pagi/sore/tidor = good morning/afternoon/night,
slamat minum/makan= enjoy your drink/meal.
Wae Rebo wird vu Flores Tourismus und diverse NGOs als Kultur-Sight pusht. Klar chemed jede Tag Touris hie ane und es isch au nid ganz günstig mit Anefahre, Guide, Übernachte, Esse und Spende. Trotzdem sind dLüt zumindescht augeschinlich sehr authentisch und lend sich vu Touriste nid gross la störe. So gseht mer Fraue bim Kaffee verarbeite oder Wäsche, die Dorfältischte wached übers Dorf, und Chinder, Hünd, Chatze und Hüehner tolled derzwüschet umenand.
So wie überall sind dChinder die neugierigste: schnell chemeds zu eim ane, wend wüsse wie mer heisst, woher mer chunnt und lend sich au gern uf es Fotoshooting i :) au am Shane sine Magic Tricks hends sehr Freud gha.
Wae Rebo lit uf fascht 1'200m, somit chas ohni Sunne schnell mal chüel werde. De neblig Teil vum Nami hemmer mit Uno mitem Nofar im Guest House verbracht. Wos denn wieder ufgrisse het, hemmer dusse de Chind bim Fuessball spile zuegluegt - das gits au nu im hinderletschte Dorf, inkl. Özil Shirt.
Zum Znacht sind denn nu meh Touris cho, v.a. vu Jakarta. Da vor churzem de Ramadan zEnd isch gsi, nutzed vil Moslems dGlegeheit zum chli reise.Read more