Off to Matamanoa

Hüt simmer wieder wiiter gfahre, vu Rakiraki zum Hafe vu Denarau. De sunneverwöhnti Norde isch vil trochner als de Süde, zudem isch dKings Road weniger befahre und somit au weniger pflegt als dQueens Road (Ironie?) - die Strass glicht zwüschetdure amene Flicketeppich us Asphalt. Immer wieder überholt mer schwer beladni Lastwage mit Berge an Zuckerrohr - sie röchled mit vil schwarze Abgas dHügle deruf. All paar hundert Meter chunnt es Dörfli, immer mit de obligate Speed Bumps am Afang und Endi - und überall warteds ufe Bus :) DLädeli in dene Dörfli hend denn au ganz hochtrabendi Näme, wie Shopping Center oder Complex - derbi sinds nid vil meh als en chlini Wellblechhütte :)
In Denarau simmer numal zu eusem TripAdvisor-rabiate Italiener und denn miteme Schnellboot zu euser Resort-Insle Matamanoa, en chlini Insle i dr Gruppe vu de Mamanucas. Kitschigerwis isch grad "La Isla Bonita" vu dr Madonna am Radio gloffe, grad womer ufd Insle zuegfahre sind :)
Nachem eher schlechte Pris-Leischtigs-Verhältnis uf Viti Levu hemmer vu dem 3* Resort nid allzu vil erwartet - au dTripAdvisor Reviews sind guet, aber durchzoge gsi. Doch womer da acho sind, hemmer erfahre as sResort erscht grad vor 3 Mönet nachere Sanierig wiedereröffnet worde isch - alles isch neu und piekfein! Neue Pool, mit Steimuure und grossi Rattanmöbel, gmüetlichi Zimmer - eifach es schöns, entspannts Ambiente. Mer sind somit überglücklich, die negschte paar Täg in dem wunderbare Hotel chenne zverbringe!
Scho churz nach de Akunft simmer uf Erkundigstour, sind mal um die ganz Insle und ufe höchsti Punkt ufekraxlet, da het mer en tolli Ussicht uf die umliegende Insle und de Sunneundergang - euses fixe Plätzli für die kommende Äbige :) es isch scho nu es speziells Gfühl, so ufere chline Insle i dr Mitti vum grosse Pazifik zsi... sogar vum höchste Punkt vu Matamanoa gseht mer durchs glasklare Wasser bis zum Meeresgrund mit de dunkle Riff.
Znacht isch am Strand serviert worde, under sterneklarem Himmel, windstill und mit Musiker wo vu Tisch zu Tisch pilgeret sind und jede Musikwunsch probiert hend zerfülle. Bi eus isch das es fidschianisches Liebeslied gsi, gemäss Sämys Wunsch mit vilne unterschiedliche Stimme. Zum Schluss hemmer nu zwei Liechtesteiner kenneglernt, Sabine und Sandro - sie isch wie dMartina grad am ufhöre rauche und en verständnisvolli Lidensgenossin :)*Read more