Satellite
Show on map
  • Day 95

    Snorkelling in turquoise waters

    July 22, 2018 in Fiji ⋅ ⛅ 25 °C

    Nach Martinas BodyBoss Morgesport und feinem Zmorge mit direktem Meeresblick simmer ufe gfüehrti Schnorchel-Tour... nid asmer nid alei chennted schnorchle, aber die ganz Insle isch vumene breite Riff-Gürtel umgä, darum hemmer eus mal vu de Profis welle zeige la, wo ases de am beschte isch... und mer sind nid enttüscht worde: sWasser isch kristallklar, mit schöne Koralle mit Dropoff, mehrere Schildkröte und Triggerfisch, und sogar en Riffhai ufem Rückzug. Euse Guide het denn nu us gues 25m Tiefi en ovali Seegurke usegfischt: offebar gilt die bi Inder und Chinese als Delikatesse und isch oft tür verchauft worde. Etz gilt sie aber als überfischt und staht für die negschte paar Jahr under Arteschutz, as sich dPopulation chan regeneriere. (Euse Guide het sie denn au wieder zruggleit.)
    Nach dem super Schnorchle isch klar gsi: mer mend ga tauche, koste es was es wolle! Bim sehr sympathische britische Dive Guide Trev hemmer denn grad en erschte TG für morn buecht, de Sämy faht sogar mit sine Specialty Dives füre Advanced OWD a (nachdem de Trev am Sämy sind Junior OWD usem 2000 usglacht het).
    Dernach hemmer de reschtlich Tag mit Pool- und Ozean-Abchüele verbracht, einigi gueti PingPong Match und natürlich mit Lese (Martina) und Serie luege (Sämy). Wel dSunne "so schrecklich blendet" het, het sich de Sämy sogar es privats Kino mit Chüssi zum Abdunkle igrichtet :D
    Churz vor Sunneundergang simmer de numal ga schnorchle, dismsl uf eigeti Fuscht und vum Strand statt vom Boot us. Mer sind überrascht worde, wie wiit asmer da mues useschwimme zum zum Dropoff zcho, und wie nöch mer in de Welletäler am Riff cho isch... knapp gschätzti 200m wiit paddled mer über 1-2m tiefi Koralle. De Dropoff selber isch numal atemberaubend gsi, ganz es tiefs, intensivs blau - sowas hemmer beid nu nie so schön gseh! Dusse hemmer de numal mehreri Riffhaie gseh, sogar en Baby-Hai im seichte Wasser... zudem nu en grosse Regeboge über Wasser, zwüschet de undergehende Sunne und enere Regefront.
    Zum Sunneundergang hemmer trotzdem euses Glück probiert und sind numal mit Sabine und Sandro zum höchste Punkt vu dr Insle kraxled... doch leider isch dSunne nid im Ozean, sondern in Wulche under gange...
    Read more