Deep Shark Dive Pt.1

Nachere für eusi Verhältnis churze Nacht (sprich 7 Stund) simmer uf zum es zweits Mal da uf Matamanoa ga tauche. Mer sind wieder zur Insle Mana duregfahre, dismal aber uf die ander Siite vum Riff wo sich "Supermarket" nennt. Der Spot isch bekannt für vili Hai (früener hend anderi Dive Shops hie au dHaie gfüettered) - und mer sind nid enttüscht worde! Scho bim Abtauche hemmer ca. 5 Black und White Tip Sharks gseh, vil wiiteri hend dunne uf eus gwarted und sind neugierig eus ga beguetachte. Die eher chlinere Riffhaie sind eim sehr nöch cho, nur ca. en Meter entfernt sinds elegant a eim verbigschwumme! Uffallend isch au gsi, as dFisch nebed dene Haie irgendwie ihri Scheu verlore hend, vil Fisch sind nur es paar Zentimeter vu eusne Maske entfernt umegschwaderet und en Grouper hätt sich am liebste uf am Sämy sini Flosse anegleit! Nebed de vilne eher schanke und chline Black und White Tip Sharks hemmer au Grey Reef Sharks gseh, die sind grösser (mer schätzed ca. 2.5m) und gsehnd us wie "the real deal", also wiemer sich Haie so us de Filme vorstellt. Nach es paar Minute Shark Watching hemmer eus wiiter am Riff entlang la triibe la (btw hemmer bi dem TG meh Strömig als bim eigentliche Drift TG gha) und hend eus sehr an de schöne Koralle, vile Fisch und ab und zue an wiitere Hai im Blaue oder schlafend ufem Sandbode erfreut. Als wiiters Highlight simmer nu durch en senkrechte Swimthrough uf knapp 30m abetaucht und de Sämy het nu sin offizielle Deep Dive Kursteil abgschlosse - wieder idrücklich gsi zgseh, wie roti Gegeständ in dere Tiefi nur nu schwarz erschined!
Nachem Uftauche het eus de Trev verzellt, das sig eine vu de beschte TG woner a dem Spot gmacht heig - es sig selte asmer so vil Hai und so vil Fisch mit so gueter Sicht heig :) zudem heter eus verrate, aser selber gar nid gern Haie heig und as si ihn nach all dene Jahr immernu ischüchteret! Zum Glück heter eus das erscht nachem TG verzellt...
Nach dem tolle Tauchgang und de eher choppy Überfahrte hemmer eus denn mal messe erhole (schliesslich hemmer ja au en churzi Nacht gha) - so simmer numal is Bett chli ga nacheschlafe :)
Nacheme fuule Namittag simmer numal ga schnorchle und hend euses Glück mitere billige GoPro Kopie probiert... zwar alles zimli blau und unscharf, aber immerhin paar Erinnerige zum Festhalte :)
Zum Sunneundergang simmer zum letschte Mal zu eusem Ussichtspunkt und hend numal dCastaway Insle bewunderet, während dSunne im Dunst versunke isch.
Zum Znacht simmer mit Gsang und Trummle underhalte worde... dMatamanoa Band het eus denn bi eus am Tisch mit "Leaving on a white boat" (statt Jet Plane) mehrstimmig verabschiedet :)Read more