Ranu Kao & Oronga

Nachdem mer numal usgschlafe hend zum euse Mini-4h-Jetlag züberwinde, hemmer eus zur Erkundig vu dr Osterinsle ufgmacht. Zerscht mal paar Fakte: Die 166 Quadratkilometer gross Insle bestaht us schätzigswis 80% Nationalpark, somit mues mer zerscht Mal es 80 Dollar türs Ticket chaufe, suscht chunnt mer nid wiit... derfür chamer 10 Täg die drüeckig Insle am beste zFuess, mim Velo oder ufeme Pferd erkunde. Hüt hemmer mal die eifachsti Variante gwählt: zFuess simmer vu Hanga Roa uf de südlich Hügel gwanderet. Det gfindet mer einersits de gross und bewachse Kratersee Ranu Kao und Überrest vum prähistorische Dorf Oronga.
Spätischtens sit Super Mario kennt jede dSteichöpf vu de Osterinsle - die rund 900 Skulpture sind vermuetlich für Ahnekult brucht worde. Oronga zügt vu dr Zit dernach, wo die Iheimische nüm primär dAhne, sondern dGottheit MakeMake verehrt hend. Die 54 Hüser im Dorf Orongo sind nur es paar Wuche im Jahr brucht worde, nämli während de Früehligs-Zeremonie und Wettkämpf.
Überall in Hanga Roa gseht mer grossi und wuschligi Hünd. Sie sind ganz zuetraulich und folged eim au gern, wenn sie sGfühl hend as si nu was zEsse bechemed. Ufem Rückweg vu Orongo het eus au en grosse wisse Hund begleitet ("Blanco").
Sehr idrücklich isch au die wild schwarz Küste: schinbar ungebremst pralled die riesige Pazifik-Woge ans Vulkangstei - meh als 100m WhiteWash umgebed dInsle. Hüt Morge hemmer sogar paar waghalsigi Surfer gseh, wo sich ohni Azug in die ischalte, 3m höche Welle gwagt hend!Read more