East & north coast on horsebacks Pt.1

Nach Wandere und Bike folgt hüt en dritti Art dInsle zerkunde: per Pferd. DMartina isch nachem letschte eher stürmische Riit-Erlebnis in Südafrika zerscht nu chli skeptisch gsi, aber es het sich als fabelhafte Usflug usegstellt!
Gstartet simmer in Ahu Akivi, da womer geschter zum Maunga Terevaka hend welle losfahre. De eint Guide het eus da verzellt, as die siebe Moais in Ahu Akivi die siebe Könige vu Polynesie darstelled. Eine vu ihne, de Hotu Matua, het aber kei Land gha und isch darum vu de andere Könige ufgforderet worde, sich neus Land zsueche. Das heter gmacht und isch so ufd Osterinsle cho. Zur Ehrig vum Hotu Matua und de sechs wiitere Könige vu Polynesie het mer die Moai in Ahu Akivi erstellt, passend daderzue sind au siebe Clans uf dr Insle gründet worde.
Jedefalls simmer vu Ahu Akivi richtig Norde an de Westküste entlang gritte. Der Teil vu de Insle ghört au zum NP, isch aber nid über Strasse erschlosse - diversi Trails chamer zFuess oder zu Pferd erreiche. Somit isch dLandschaft sehr rau, teilwis öd, mit vil schwarzem Gröll übersäiti Grashügel. Uf dr ganze Insle gits vil Pferd, wo zwar all öppertem ghöred, aber teilwis meh oder weniger frei umelaufed. Sie werded v.a. fürd Landwirtschaft und als Transportmittel gnutzt, mer isst sie aber eher selte (anderscht als in Indonesie...) Ufem Weg hemmer aber immer wieder Pferdeschädel gseh und au dÜberrest vumene verwesende Kadaver - dPferd hend hie kei natürlichi Finde, aber teilwis verdurschtets in de wiite Hügel ohni Flüss oder Seeä.
Zrugg zu de lebendige Pferd: am Sämy sis het übersetzt "Strubbel-Haar" gheisse (mit passender wilder Mähne) und a dr Martina ihres het (ebefalls passenderwis) Uri gheisse - Churzform vu "uri uri" wo uf Polynesisch Schwarz heisst (sPferd isch allerdings nur als Fohle schwarz gsi und isch etz eher rot-brun)... dPferd werded hie scho sehr früe igritte: scho nur 4 Mönet alti Fohle werded is Meer gfüehrt und seled sich so langsam anen Riiter gwöhne. DInsulaner schwöred uf die Wasser-Iritig, da so de Wille vum Pferd nid broche wird und "jedes Pferd sini Persönlichkeit cha bhalte".
Euse Guide Rodrigo het eus sicher über Stock und Stei gführt, de Hang deruf, wieder and Küste und wieder deruf - mer sind so froh gsi as hüt dPferd und nid mier gloffe/gfahre sind! An de Nordküste hemmer mehrmals Halt gmacht, u.a. bim Ahu Tepeu, Omohi und Papa Tekena. Da hemmer alti Petroglyphe gseh, vu Thunfisch, Wale, Schildkröte und dZeiche fürd Gottheit MakeMake. Mer hend dÜberrest vu Schlafhütte gseh, das sind fensterlosi, ca. 1m hochi Hüttene wo usgseh hend wienes umgedrehts Kanu. Die Konstruktione sind immer nach Norde usgrichtet gsi, da vu det immer stürmischi Wind gweiht hend und so sHuus durchd Stromförmigkeit gschützt gsi isch. Während d"Adlige" in dene Kanu Hüttene gschlafe hend, hend d"Sklave" messe mit tiefe Höhlene vorlieb nä - mer hend eini besichtigt, wo über und über mit MakeMake Zeiche igritzt gsi isch.
Vu det simmer wiiter de Nordküste entlang richtig Oste, dPferd hend dank ihre unbeschlagne Huf immer es Wegli durchs Gröll gfunde - au wenn am Sämy sis Pony immer chli en eigne Chopf het gha und de Martina ihrem Uri immer de Weg abgschnitte het... zum Schluss hemmer eus pudelwohl gfühlt und sind die letschte grasbewachsne Hügel trabet.
In Anakena acho het de Rodrigo dPferd gno und mier hend gmüetlich Zit gha zum was Esse, Bierli ztrinke, dGegend zerkunde und es Noni zmache :) Anakena isch eine vu wenige Sandstränd uf de Osterinsle, interessanterwis ischer sogar wiss und nid schwarz wie die umliegende Vulkanfelse! Gmäss de Legende isch de siebti König vu Polynesie, de Hotu Matua, hie serschte Mal uf de Osterinsle glandet - Anakena gilt somit als "Wiegi vu de Kultur vu Rapa Nui". Au da gfindet mer paar Moais - en ältere chline und es paar neui, wo uf en bestehendi Plattform drufbaut worde sind. Offebar sind die Steimännli ursprünglich chliner gsi, somit isches au eifacher und weniger ufwändig gsi zum si zproduziere. Doch je meh Lüt uf Rapa Nui glebt hend, desto eher hend sich dStammes-Afüerer chenne leiste, grösseri und ufwändigeri Moais in Uftrag zgä - wo demnach au für meh Macht und Wichtigkeit gstande sind.*Read more