Pinochet and cheese fondue

Hüt hemmer de Grossteil vum Tag im "Muséo de Memoria y de los Derechos Humanos" verbracht, im "Museum des Gedenkens und der Menschenrechte". Da hemmer einiges über dMilitär-Diktatur erfahre, wo zwüschet 1973 und 1989 in Chile gherrscht het. Da numal es Résumée für eus Gschichts-Laie:
Vor 1973 het de Salvador Allende als demokratisch gwählte Marxistische Präsident regiert (btw de einzig vu de Welt!). In dere schwierige Wirtschaftslag het er sich für Abschottig vor usländische Investitione, Verstaatlichung vu grosse Unternehme, Erhöchig vu de Staatsinvestitione und Umverteilig vum Vermöge im grosse Stil igsetzt... leider vergeblich. Darum het am 11. September 1973 dMilitär-Junta putscht (btw au durch amerikanischi Undergrabig verschuldet), en Bandi bestehend us allne Generäl vu Heer, Marine, Luftwaffe und Polizei, agfüehrt vum oberste General Augusto Pinochet. DJunta het all amtlichi Gebäude la ruume und beschosse, Masse-Medie lahm gleit und en Usgehsperri verhängt. De zuvor amtierend Präsident Allende het im Amtsgebäude La Moneda usgharrt, en sehr starchi letschti Botschaft a sis Volk per Funk duregä und sich denn sLebe gno. Dernach het de Pinochet sLand während 16 Jahr mit iserner Hand gfüehrt.
DUsstellig im Menscherechts-Museum het sich primär umd Zit während de Diktatur dreiht. Under de Regierig vu dr Junta sind fascht 40'000 Lüt gfolteret und über 3'000 umbracht worde. In sehr ufwändige und detaillierte Bilder, Texte und Videos zeigt sMuseum uf, wie dMänsche zu dere Zit glebt hend, wie sie gfoltered worde sind (v.a. durch Elektroschocks) und ihri Aghörige gsuecht hend, wo teilwis jahrelang oder sogar für immer verschwunde sind. In de 80er Jahr het dBevölkerig meh und meh agfange sich wehre, doch immer wieder hend bluetigi Zwüschefäll dLüt im Zaum ghalte.
DUsstellig isch eus under dHuut, mer sind tief beidruckt und schockiert gsi, as sich de Pinochet bis 1989 a dr Macht het chenne halte. V.a. isch er au nachher, zu "demokratische" Ziite, bis 2005 nu im Senat gsesse - und es Jahr später ohni Prozess, ohni Straf, ohni Sanktione über 90-jährig storbe! :o wie het so öppis i dr hütig Zit chenne passiere? Wieso het mer da nid interveniert, womer doch so vil Augezüge het gha - u.a. au de Papst Johannes Paul II?!?
... uf jedefall hemmer eus nach paar Stund bewegender Gschicht wieder ins Getümmel vu Santiago stürzt. Rund umd Estacion Central gfindet mer Strasse mit farbige Hüsli, Micro-Lädeli und -Restis, grösseri Marktständ mit Chleider und Schueh und riesige Malls mit Food Courts us aller Welt... und überall so vil Lüt am poschte! Wiene strubi Mischig us Italie und Singapur...
In jedere Strass lauft was: entweder en selbsternennte Sänger het en Box montiert und singt halbherzig zu irgendemene Hit mit (wie en völlig verfilzte chilenische Rastafari wo Bob Marley het la laufe obwohl er wohl chum es Wort Englisch red), oder irgendwas wird verchauft... mer findet uf Tüecher oder Blache usbreitete Schuck, Chleider, Büecher,... in de Metro-Underfüehrige werded luuthals Wasser, Snacks, Kabel und Socke apriese... wunderlichi Kombination :)
A propos Metro: ufem Rückweg vum Museum zrugg ind Innestadt simmer nu per Zuefall grad nebedeme Freestyle Rapper im Wage stande :) plötzlich packt er sini Box us und faht a rhyme, derbi heter eus als usländisches Pärli sehr herzlich in Chile begrüesst :)
Nachere churze Verschnufpause im Hostel simmer numal inen Vorstadt usgrückt - dismal zum ga Fondue esse! Mer planget scho so lang uf schwizer Esse, asmer dem schwizer Resti nid hend chenne wiederstah :) nacheme ganz ordentliche Fondue hemmer eus ufe (eher wiite) Heiweg gmacht und sind leider nid wiit cho... dMetro tuet hie scho am halbi 12i zue! Mer hend wohl zimli verlore usgseh, so het eus die älter Party-Nudle Rose-Marie under ihri Fittiche gno und eus zum Bus glotst, wo eus zrugg zum Hostel bracht het... was fürne Ufwand für chli Chäs!Read more