Uyuni-Tupiza

Wie erwartet hemmer im Casa Andina sensationell und kuschlig warm gschlafe - was fürne Wohltat nach zwei chalte Nächt! Womer am 5i scho wieder uf sind, het eus sHotel sogar nu sZmorge parat gmacht :o
Euse Bus uf Tupiza wär planmässig am 6i gfahre, eigentlich hätt mer am halbi 6i messe det si... doch dReception het eus scho vorgwarnt gha, as die Büs selte pünktlich sind und asmer eus ruhig selled Zit la... doch als gueti Schwizer hemmer denn doch vor de offizielle Abfahrtszit welle det si, das hemmer denn mitere halb Stund warte a de Chälti büesst :( bis zum Schluss hends nu Passagier gsuecht, indem dTicket-Verchäuferin imene Sing-Sang lut dDestinatione usgrüeft het: Atocha - Tupiza - Villazon. Ca. am halbi 7ni isches denn los gange. Für 40 Bolivianos pro Person (umgrechnet chli meh als 5 CHF) het eus en zimli altersschwache und iischalte Bus ufs 4 Stunde entferne Tupiza bracht. Doch die eigentlich Fahrzit isch um en langi Pause in Atocha verlängeret worde... da hemmer eus en Tee to go kauft: hie bechunnt mer das nid öppe in Plastikbecher serviert, sondern in zueknöpfte Plastiksäckli miteme Röhrli drin :) uf jede Fall super zum sich dHänd zwärme :)
Atocha het eus numal dArmuet vu Bolivie vor Auge gfüehrt - särmste Land vu Südamerika! Es lit vil Abfall ume, wo Hünd und Lumpesammler drin nuschet und es öffentlichs (aber Mist-dreckigs) WC findet mer da erscht nach 15 Minute Irr-Laufe durch die leere Gasse... uffallend vil Fraue abem mittlere Alter sind nu traditionell azoge: offni Slippers, Strümpf mit Wulle-Stülpe, farbigi chnülangi Röck mitere Schübe, obe en Bluse miteme Poncho oder en drapierte Schal, und denn en schwarze Hut mit runder Krempe. Sie trägends mitere grosse Würde und zeiged sich vu eus Touris völlig unbeidruckt.
Nach Atocha het eused local Bus Abentür erscht agfange: dStrass isch zwar schön breit und meischtens asphaltiert oder zumindescht planiert gsi - aber dStrecki selber het scho gnueg beidruckt! DStrass het sich a jedem Berg derufgschlänglet, einisch simmer sogar länger ufere Art Grat gfahre: links und rechts isches steil derab :o a vilne Orte isch dStrass tief in Berg inegrabe, so asmer uf beidne Siite nur abgschabti Felswänd gseht... churz vor Tupiza überquert mer es fascht ustrochnets Flussbett, derbi gahts mim Bus durch drü Bäch :o da hemmer nid schlecht gstuuned! Keis Wunder isch die Strecki in de Regezit gsperrt...
Tupiza selber isch es charmants Städtli, usere Mischig vu niedrige Lehmhüser und imposante Kolonial-Baute. Nur das mitem Vercher isch chli verwirrend, niemert kümmert sich umd Ample - mängi Ample zeiged sogar glichzitig rot und grüen a :)
De Rest vum Tag hemmer mit Erkunde, Plane und Fuulenze verbracht. Zum Sunneundergang simmer nu churz zum Mirador Corazon de Jesus spazifizottlet und hend die umliehende Berge und Canyons im Abigrot bewunderet.
P.S.: dMartina het leider wohl i dr letschte Nacht im Salar de Uyuni Bed Bugs abbecho :( so gseht sie im Moment chli wie de Karl Dall us: eis gschwullnigs Aug plus en Biss-Chranz uf dr Bagge :( hoffemer sAntihistamin und Fenistil schlend gli a! Da isch dChälti mal en Vorteil gsi, wel mer so dick ipackt gsi sind, het dMartina nur a de einte Gsichtshälfti was abbecho... de Sämy het sogar mit siner Schlapp-Ohr-Chappe gschlafe und isch so verschont worde :)Read more