Wild West & a lost fight Pt.1

Hüt hemmer für eusi Verhältnis richtig usgschlafe - fascht bis am 8i :) dernach simmer zunere Pferdetour ufbroche, um dUmgebig zerkunde. Nid umsuscht heissts, as dLandschaft rund um Tupiza de eigentlich Grund zum bsueche sind: hie gsehts us wie im Wilde Weste! Tiefroti, bizarri Felsformatione, verschachtelti Canyons, uströchneti, breiti Flussläuf... so hoch zu Ross hemmer eus scho chli wie Cowboys gfühlt :) zämä mit eusem Guide Marcelo hemmer die Must-Do-Sights abklapperet: dPuerta del Diablo, Valle de los Machos, Canon del Inca, Canon del Duende, Zmittag bim Toroyoj, la Torre, Entre Rios, usw... es het eus super gfalle! Dismal simmer au recht flissig am trabe und galoppiere gsi, durch schmali Wegli, mehrmals durch meterhöchi Flüss und am Schluss sogar nu durch es Zugtunnel, wo sit de letschte Überschwemmig im Januar nur nu vu Wanderer und Riiter brucht wird... dPferd hend eus meischtens recht guet gfolgt, nur ufem Heiweg hemmer chli Müeh gha eusi Pferd im Schritt zbhalte...
Ca. halbwegs hemmer nu es luschtigs Erlebnis gha: nach de Puerta del Diablo gsemmer es Auto ufem Weg - mer hend eus scho gwunderet, wer denn sonen Touri Tour statt zFuess oder zu Pferd mimne altersschwache Kombi macht. Da sind en Frau mit Mikro und en Maa mit chliner Kamera usgstige und hend gwartet as mier nöcher chemed. De Sämy het grad verstande ases sich wohl um es Interview handelt und het sie direkt zur Martina dirigiert ("EL habla Espanol" - merci für s männliche Pronom!) So het dMartina a de Reporter vu "Faceta Cultural" es paar Frage beantwortet :)
Während de Tour het denn aber leider au de Touchscreen vu dr Martina ihrem Handy definitiv de Geischt ufgä... de Kampf isch lang und ermattend gsi: scho agschlage simmer dermit ufd Reis gstarted, denn isches in Franschoek vertikal uf en Steibode gheit, es paar Wuche später het sDropdown Menu nüm funktioniert, bim Arbol de Piedra isch nu chli Sand ind Screen-Ritze inecho... und hüt het de Touchscreen sim Name kei Ehr meh gmacht, sondern eifach willkürlich irgendwo klickt... naja, zum Glück hemmer es alts Ersatzhandy derbi - etz memmer halt mit schlechtere Foti-Qualitäte vorlieb nä... :(
Mit schmerzendem Fudi & Bei aber glücklich hemmer eus in Tupiza ufd Suechi nachere Bar gmacht - und smunzige "Lädchen" gfunde. Der Bier und Kaffee Lade wird vumene sympathische Dütsch-Bolivianer gfüehrt (wo genau wie euse Guide au Marcelo resp. Marcello heisst), mit dem mer denn zwei Stund lang Craft Beer trunke und philosophiert hend.
Liecht beduselt simmer zrugg is Hotel und ohni Znacht oder Footprint direkt ga Schlafe - 7h Riite het eus doch zimli gschluuched... :)Read more