Satellite
Show on map
  • Day 138

    Huayna Potosi Base/High Camp

    September 3, 2018 in Bolivia ⋅ 🌙 2 °C

    Hüt Morge het eus sDream Team Macario und Ruben zur Huayna Potosi Tour abgholt - dismal isch au dSonia, am Macario sini Frau, als Trägerin mitcho. DSonia isch en fröhlichi Cholita mit silbrig umrahmte Zähn wo eus für knapp 20 CHF pro Weg euses ganze Material füre Berg zum High Camp ufegschleppt het... mer hend scho chli en schlechts Gwüsse gha as sie mit ihrne Schüeli (nid emal Wanderschueh!) so vil Zügs für eus schleppt!
    Aber etz zerscht mal vu vorne: vu La Paz simmer zrugg richtig Cordillera Real gfahre, dismal aber in es anders Tal als bi dr letschte Tour. Ufem Weg zum Base Camp bim Zongo Pass chunnt mer an mehrere farbige Seeä verbi und in diverse Mine werded Bodeschätz abbaut. Offebar hets vor es paar Jahr en bluetigi Usenandersetzig zwüschet Polizei/Militär und de Minearbeiter gä - vorem Zongo Pass gseht mer darum nu en relativ grosse Friedhof mit Mini-Kapelle-Gräber.
    Nacheme gschnelle Zmittag im Base Camp uf 4'700m simmer ca. zwei Stund ins High Camp uf 5'130m gwanderet (wie vorher erwähnt vu de Trägerin Sonia begleitet). Det hemmer eus nu chli vertwiilet, de Sämy het sensationell 5x nachenand im Yatzy verlore und nu vor de 8i simmer im Refugio Rojo in euse Schlafsäck glege und hend probiert, eus uf die bevorstehende Strapaze vorzbereite.
    Read more