Satellite
Show on map
  • Day 139

    On top of Huayna Potosi Pt.1

    September 4, 2018 in Bolivia ⋅ ⛅ -1 °C

    Nachere nid ganz so erholsame und churze Nacht simmer hüt Morge am 3 zum Huayna Potosi ufbroche. Scho de Start isch nid ohni gsi: mit de Stiigise simmer es schmals und wackligs Gröll-Wegli deruf. Chum simmer ufe Glegschter gstosse, isches grad deruf gange und derzue het en iisige Wind pfiffe. Trotz de Bewegig und vilne dicke Thermo-Schichte isch dMartina nach zwei Stunde tiefgfrore gsi... trotz 4 (!) Paar Händsche und mehrerne Jagge (inkl. zuesätzlicher Daune-Jagge vum Macario) isches ihre eifach nid wärmer worde... doch dMartina het sich nid welle vu dr Chälti gschlage gä - nur nu es paar Stund durehebe, denn wärmt dSunne eim scho. So simmer immer wiiter ufe, teilwis durch zimli schmali, steili Passage, immer mit de Gletscherspalte under eus im Blick.
    Nach zwei Drittel hemmer so richtig messe bisse, im Zick-Zack het sich de Weg steil de Gletscherwand deruf gschlänglet, teilwis het mer instabil ussehendi Felsblöck messe überquere... oft het dEnergie nur für 20 Schritt glanget, de het wieder gheisse "una pequeña pausita por favor!" Doch de Gipfel isch eifach nid nöcher cho!
    Nach 6.5 Stund, unzählige Mini-Pausene, vil Bieste und Zwinge isch de Gipfel endlich in Riichwiiti cho: und eus isch nüm nur weg de dünne Luft de Schnuf wegblibe: plötzlich staht mer uf dem einsame Gipfel, alles lit under eim, en herrliche Blick uf die verschneit Cordillera Real und de Titicacasee... mer hends tatsächlich gschafft und stehnd ufem 6'088m höche Huayna Potosi!
    Im Abstieg simmer denn wieder "campeones" gsi, knapp zwei Stund hemmer zrugg is High Camp gha - so hemmer overall 8.5 Stund gha, was wohl zimli en normali Zit isch... dMartina isch uf jede Fall heilfroh gsi, as sie vor 1.5 Mönet sRauche ufgä het :)
    De Rest vum Tag isch unspektakulär gsi: de Macario, Ruben und Sonia hend eus zrugg uf La Paz bracht (nachdem mer de zweit Pneu vu euser Reis hend messe wechsle - wieso lernt mer das i dr Schwiz nid?) und mier hend de Abig mit Bier, Burger & Bett la usklinge :)
    Read more