50 shades of green

Mer hend herrlich gschlafe und sind am Morge vu Vogelgezwitscher und erstem Tagesliecht gweckt worde. Da euses Bungalow nur gspannti Netz als Wänd het, ghört mer jedes Blatt raschle und jede Vogelschrei - znacht sammlet sich dFüechti und perlt vu Blatt zu Blatt, so asmer am Morge sGfühl hend gha, es regni. Vor de 9ni isch de Madidi NP (btw ca. halb so gross wie dSchwiz) nu in Nebel ghüllt, die starch und warm Sunne vertribt die Schwade aber schnell, so asmer wieder en herrlich wulchefreie Tag hend derfe gniesse.
Nu vorem riichhaltige Zmorge hemmer en Art beige Otter gseh, wo en Banane isch ga stibize. Später simmer zumene usdehnte Morning Walk ufbroche und hend eus der unglaublich Sound la erchläre la: Spechte, Eichhörnli und diversi Vögel. De Herman het eus Bäum zeigt, wo vunere Ficus-Art umschlunge werded - sie werded sozsäge "erwürgt", darum nennt mer sie "strangled trees". Wenn der Bibosi de Baum ganz umschlingt, stirbt de Baum ab, so dass i dr Mitti oft en Hohlruum zrugg blibt. En andere Baum het ganz dicki Dorne - früener hend dLocals die Rinde abglöst und als Falle brucht. Wenn so dTier uf die spitzig Underlag gstande sind, hends nüm recht und v.a. nüm schnell chenne laufe, so as dJäger nachher eifachs Spiel gha hend. Au dLiane "uña de gato" (benennt wel sie Dorne wienen Chatze-Nagel het) isch zum Überlebe im Dschungel hilfriich, die chamer ufschniide und sWasser direkt drus trinke.
Meischtens simmer schmale, ustretne Pfad gfolgt - doch mängisch isch de Herman abrupt stah blibe, het glost, selber Grüsch gmacht und isch inen neui Richtig dervo - oft heder derbi für eus en neue Pfad mit dr Machete bildet. So hemmer mehreri grossi Gruppe Affe gseh - sowohl chlini und zuckersüessi Yellow Squirrel Monkeys als au chli grösseri, bruni Kapuziner-Äffli. DKapuziner-Affe sind offebar gschiider als dSquirrel Monkeys, darum bildets oft gmischti Rudel wo vu de Kapuziner agfüehrt werded.
Inere churze Marsch-Pause hemmer anere grosse Spinne bim Netz-Bau chenne zueluege - chli später sind ihre sogar zwei Viecher inegfloge und mer hend genau chenne luege, wie dSpinne sie igwicklet und zum "Verdaue" parat gmacht het.
Sicherlich sidrücklichste vum Morge sind dWildschwein gsi: zerscht schmöckt mer nur en undefinierbare Gstank und denn ghört mer sie Grunze. Mer hend eus probiert azschliiche, doch euses ganze Anti-Brumm und eher tollpatschige Schritt ufem Laub- und Äst-bedeckte Bode sind wohl nid ganz unuffällig gsi... denn isch sTheater losgange: aggressivs (Warn-)Grunze vu Eltere, ängstlichs Quiecke vu de Ferkel und Getrappel. Einisch hemmer dFamilie knapp verpasst, szweite Mal hemmer nu churz zwei grau-schwarzi, fascht hüfthöchi Erwachsni chenne erspähe. Mer wüssed etz, wieso as sich die Iheimische vu Chopf bis Fuess mit Schlamm iribed, wenns uf Wildschwein-Jagt gend :)
Zrugg im Camp hemmer eus vu de Spanier Yasmina und Manuel verabschiedet und hend en längeri Siesta ghalte - all die Idrück mend verarbeitet werde!
Später simmer nu chli verschlafe ufd Namittags-Tour - dismal simmer dPlantage vum Camp ga aluege: Banane (wo mer pro Pflanze nur einisch cha ernte, aber immer wieder neui Strünk tribt), Yucca (de Herdöpfel vum Amazonas), Mango, Papayas, Kaffee, Kakao und Ananas (wo ufere Art Aloe Vera wachst und au unne a dr Frucht immer neui Trib het). De Herman het eus denn nu en roti Palme-Blueme zeigt, wo dFraue traditionellerwis zu Fäscht als falschi Nägel nutzed. Zudem hemmer die Sack-artige, vu Palme hängende Nester vu de Oropendula Vögel gseh - das sind die Vögel wo eus mit ihrem Wasser-Geplätscher-ähnliche Schrei hüt Morge gweckt hend.
Im Madidi NP gits aber au weniger gmüetlichi Ziitgenosse: tief im fascht 20 Mio. Hektare grosse Park sells immernu Kannibale ha (sVolch vu de Toromomas), wo nu nie mit de Zivilisation in Kontakt gsi sind. Zudem hemmer die namensgebende Madidi Ants gseh, das sind 2cm grossi Ameisi wo höchs Fieber und Entzündige uslöse chend. Zum Abschluss vum Spaziergang simmer nu um es zuegwachsnigs Seeli gloffe, da hemmer prähistorischi Watson Vögel gseh ("Chicken Bird"), mit zimli hässlicher Chrone und amene Schrei wie vumene Chette-Raucher. I dem Seeli sells au Caimans und Piranhas ha - doch wels so zuegwachse isch, hemmer keini gseh... das sparemer eus nu fürd Pampa uf :)*Read more