A bit disappointed by Rainbow Mountains

Täglich pilgeret bis zu 500 Lüt vu Cusco zu de Rainbow Mountains, de Montañas de Siete Colores. Die farbige Berge sind hüt au üses Ziel gsi - um de Masse zentflieh simmer scho am halbi 5i uf.
Die vile tägliche Bsuecher hinderlend leider ihri Spure... De Weg ufe Winikunka Berg, knapp über 5'000m, glicht amene "Autobahn Wanderweg", breit ustrete und scho lang nüm malerisch. All Kilometer gfindet mer ToiTois und Abfäll - was fürne krasse Underschied zu de letschte paar Täg!
DRainbow Mountains selber sind zwar schön - aber nid würkli serwartete Highlight vu eusem 4-tägige Trek... v.a. dLandschafte geschter hend in Kombination mit de sozsäge inexistente Touriste vil meh Charme gha. Füre Rückweg zrugg ins Tal hemmer es inoffiziells Wegli überd Hügelkuppe gwählt, nur scho da gfallts eus vil besser - wiit und breit kei Touris sondern nur Alpacas :)
So isch hüt euse Ausangate Trek zEnd gange - die vier Täg sind so schnell ume! STrekke uf konstant über 4'000m het eus nüt usgmacht - mer wäred sogar gern meh gloffe! Mit eusem Tempo hemmer jewils churz nachem Mittag scho euses Tagesziel erreicht und hend de Räscht vum Tag mit Siesta und Yatzy verbracht. SWetter isch eus au Hold gsinnt gsi: jede Morge hemmer fascht immer perfekts Wetter gha, erscht gege Namittag het de Wind erschti Wulche bracht und dÄbige sind jewils en spannende Mix us Rege, Hagel, Blitz und Donner gsi :) somit euses Fazit: gern wieder mal ga Trekke und au gern wieder mal ga Campe!*Read more