First time wave kiting!

Hüt isch en sensationelle Kite Tag gsi! Brav simmer mit Muskelkater am Morge is Yoga und nachem Zmorge uf die scho mit meh Wasser gfüllt Lagune: dMartina isch eini vu de erschte ufem Wasser gsi und het ca. en Halbstund Mensche-leeri Fluet chenne gniesse :) am Namittag hemmer eus denn de schmal Kanal derab ins Meer gwagt (dMartina mimne depowerete 4 sqm Kite!) - und det zum erschte Mal in die chline Welle! Es isch eus beidne rächt guet gange, dBedingige sind au super: mer chan bis sehr wiit use stah, die brechende Welle sind sehr chli und wiiter usse sind dWelle zwar grösser, breched aber nid :) aber das Wave Kite isch scho um einiges strenger als i de Lagune: mer mues vil aktiver fliege, ganz locker i de Chnü si und sich ufem Weg use teilwis vum Kite überd Welle la träge... derfür isch sZruggfahre uf de Wellekuppe umso cooler: mer chan richtig uf de Welle riite, sowohl obe ufem Kamm oder grad drunder, der goldig Spot womer bim Surfe oft so vergebe suecht.
De Rückweg isch derfür zimli müehsam gsi: de Kanal isch downwind bi Ebbe grad so kitebar, deruf isches en Chrampf all 15m messe zwende... dMartina isch zum Schluss nüm vum Fleck cho und isch de letscht Kilometer (gfühlti 5!) zrugg gloffe...
Nach je fascht 4 Stunde kite simmer beid zimli kaputt aber überglücklich... morn gahts uf euse erschte Downwinder!*Read more