Palomino

Nach ere Wältstadt bini is chline Palomino gange :) mitem Bus vo Santa Marta isches es richtig guets abentüür gsi. Mitem Flüger uf Santa Marta, vom Flughafe mitem Taxi an Busbahnhof und vo det mitem Bus is Dorf vo Palomino. Woni is Busterminal inegloffe bin hends mi scho ahgsproche wo dasi ane will. Natürli hends mich denn grad zum richtige Bus gfüert. Ufem wäg det ane hani gfrägt wie tür dases denn isch. Nur 5 franke (im internet hani eine für 6.50.- gfunde gha). Denn hani natürli grad zuegschlage. Bevormer bim bus ahchoo sind, het de Mitarbeiter no gseit, er chan mir de Bus au für 3.- geh, wenn ich ihm no 1.- id hand gibe 😂.
So bini also is Städtli Palomino cho, vo dete us hani no 10min töfftaxi müesse näh. 2.- isch chli viel gsi, drum hanis denn uf 1.60.- abeghandlet. Woni denn gmerkt hani wasi eigentli am mache bin hanem denn doch 2.- geh 😂 lueged ufem video wie d Fahrt gsi isch.
In Palomino hets nöd würkli viel grossi Sache geh: Esse, Surfstunde, Massage und es paar lädeli. S hostel isch aber direkt am Strand gsi 😍 Strandparties ide Hostels näbed eus mit rächt geiler Animation und en Bsuech zude Flamingos (wos au gaaaanz viel toti Chräbs gha het) isch au no drin gläge. D Töfffahrt zu dene Flamingos isch scho ah sich es Abentüür gsi. Durs Wasser gfahre, durch de Wald (mengmal hemmer müesse de Kopf bücke zumen nid ahschlah) und durch indigeni Dörfer. Anschiinend reded die einte dete kei Spanisch sondern nur die eiget indigen Sprach. Sie wüssed aber, ohni dass sie sich mit de anderne indigene Dörfer sprachlich verstönd, dass de Fisch gege Gmüess ghandlet wird..
De Bus wo die Dörfli ade Nordküschte mitenand verbunde het, isch mis highlight gsi. Er het kei Türe gha und du hesch am Busfahrer eifach chöne rüefe wo er söll ahhalte.

Fazit: au da alles rächt günschtig, viel chillt, aber d chleider hend wäg de Luftfüechtigkeit nie tröchnet.Read more