Sámara, erste Ihdruck

Nach de ahstrengende fahrt am samstig han ich mich jetzt guet am neue ort ihglebt. In sámara wohn ich bimene junge ehepaar mit emene 2 jährige meitli.
D Wendy und de Marcos sind ursprünglich vo San Jose und erst vor öbbe eim jahr nach sámara züglet. Sie sind mega lieb und da sie d yoga Lehrerinnen vo de schuel isch, bin ich die wuche scho richtig sportlich gsi. D schuel isch wieder recht näch und z fuess i 10 minute erreichbar. Will ich aber langsam recht fuul worde bin, han ich mir für die ziit da es velo gmietet und düse jetzt mit dem durs dörfli. S schuelhuus liht direkt am meer und alli klassezimmer sind mit air-conditioner usgstattet. De strand isch, im gegesatz zu puerto viejo, riisig und s wasser es bitseli kälter. Am strand hets wildlebendi Hünd und ross. Vor dene hani aber es bitseli respekt, wenns mit vollgas über de strand renned.
D natur unterscheidet sich extrem vo de karibik küste. Es het da vo de hitz uströchneti felder und d wälder sind kei tropischi uhrwälder meh, sondern eher trockeni buschlandschschafte.
Am abig isch immer chli öbis los und im gegesatz zu puerto viejo sind da d ticos (die iheimische vo costa rica) au im usgang.
Gester simmer amene einsame strand go grilliere und die wo hend chöne sind go surfe. De ganzi strand isch übersäht gsi vo eisiedler kräbsli und drum het mer immer chli mösse ufpasse wo mer ane staht.
Min erste ihrduck vo sámara isch also sehr positiv und ich freue mich uf die nägste wuche.Read more