Ersti Täg

Havana - Viñales - Trinidad

Mitem Taxi isches den zum Mietauto gange, Cubacar, womer den euse Geely in Empfang gno hend. D Übergab het eich recht guet klapped und mit de Ussag vom Vermieter "ussert dem Riss ide Frontschiebe (30cm) und de Chräbel rund ums Auto isch eich alles tiptop" hemer eus den us de Stadt use richtig Viñales uf de Weg gmacht. D Strasse uf Kuba sind sehr unterschiedlich und au uf de Autobahn hets en huufe Lüüt wo umestönd und wend mitfahre. Mer muss also richtig ufpasse das mer keine überfahrt. In Viñales acho simer den zu dere Adresse wo eus die vom Hostel in Havana geh het, die isch den aber nid ume gsi und het eh kein Parkplatz gha abr e Nachbarin het eus den zumne andere Casa particular gfüert. Wo de Jonas den het wele s Auto parkiere hets gad mal chli gspunne, d Toure sind immr wiedr abgstürzt, sodass s Auto immer wiedr gstorbe isch. Irgendwie isch den doch gange und mer hend gmerkt das s Auto doch nid so ganz tiptop isch.

Am Nami hemer bimne Usritt is Hinterland vo Viñales Tabakplantage, jensti Acker mit Frücht & Gmües, Kafiplantage und Höhlene besichtiget. Natürli hemer au e richtigi kubankschi Cigarre probiert. Nach Viñales simer den wierdr zrugg richrig Havana und wiiter uf Playa Larga gfahre. S Autofahre verlangt viel Nerve vom Jonas und sehr viel Ufmerksamkeit vo eus allne. Mer hend nemli fast en Polizist übr de Huufe gfahre, will de eifach (i grauer Uniform) uf die linki Spur gstande isch und irgendwie mit de Hand umegwunke het. Mer hend den gad na gmerkt, dass das nid eifach öper gsi isch wo will mitfahre, de Polizist eus gern het wele ahalte, so das rechts e Strassewalze het chöne iehfahre. Mer sind den somit zmitzt drin gstande, abgwürgte Motor wils Auto wiedr gspunne het und rechts isch d Walze scho recht näch cho. Nach emene unverständliche Dunnerwetter vom Polizist hemer den doch chöne dezwüsched durefahre. Nanig ganz vom Schreck erholt sind eus chli später eifach Autos uf eusere Spur entgege cho, mer hend den ganz rechts chöne fahre und hend gseh, dass d Strassearbeiter uf de Gegefahrbahn gad alli 3 Spure gsperrt hend und de Gegeverkehr somit übr de grüeni Mittelstreife het müsse, zum die Baustell umfahre. Au da hemmer wiit und breit keis Schild odr ähnliches gshe. Tja, so ischs Autofahre halt da...😂

Playa larga isch eher es verschlafnigs Fischerstädtli und nach 2 Täg sünnele und umepleuschle simmer wiiter in Weste uf Trinidad. Das isch e 500 Jahr alti Kolonialstadt mit wunderbar baute Hüser und Gasse, na ganz im Kolonialstiel: farbig, chli, Hüsli a Hüsli und dezwüsched Strasse us Kopfsteipflaschter. Dezue viel luuti Kubaner, uf de Strass odr ide Huusigäng wo umeschreied, dass die sicher selber nüm drus chömed. Natürli simmer die kubaner, wo eim alles mögliche wend ahtreie au da nid los und so tönts vo überall her: Taxi taxi, speziall preis for you, Mojito, Cuba libre, nice trips, taxi taxi, passeo de Caballo (Pferde usritt) und und und... 🙄😉

Es Highlight vo Trinidad, womer vo überall ghört hend, seg die Disco inere Höhli. Mer hend eus also mitere Fläsche Rum und ere Dose Cola uf de Terasse vom Casa müsse wachhalte, da die Disco erst am 11fi ufmacht und mer amis doch die letschte Nächt mässig guet gschlafe hend. Mit nid allzu grosse erwartige hemmer eus den uf de Weg zu dere Höhli gmacht. Da die eh jede kennt hemer immer nachem Weg chöne fräge und so simer denn über Abstellplätz und über chlini dunkli Wegli an Igang cho. D Musig het mer dusse guet ghört und so simer übr langi Stege durab immr wiiter i die Höhli cho. Mir sind usem stuune fast nüm usecho. Die Kammere isch riesig gsi und usgstattet mit Laser, Disokugle, jensti Luutsprecher, Beamer, Bars und natürli e grossi Tanzflächi. Was mer nid gfunde hend sind irgendwelchi Lüftigssystem und wie us eim Muul hemer gseit "ide Schwiiz wür das nie im Lebe gah". Mer hend somit d Nacht mit Mojitos und Tanze verbracht, (nei nid wükli Salsa). Es isch eng, heiss und klebrig gsi aber s het en heide Spass gmacht und isch definitiv es Erlebnis gsi!

Gschribe vo de Delia!Read more