Joined July 2020 Message
  • Day60

    Adieu Östereich

    October 30, 2020 in Austria ⋅ ⛅ 11 °C

    Dankem schöne Wätter ised mier wiedereinisch s Zmorge verusse bi strahlender Sunne. En churze Campingputz ghört leider au ab und zue zum Camperläbe dezue.
    Fertig demit, chönd mier entspannt no einisch is Dorf Klagenfurt am Wörtersee gah. Mier schlendered dur d Strasse und mached no en bsuech im Planetarium. Voller neuem Wisse über üsi 8 Planete gads wiiter. Zum kröhnende Abschluss gniessed mier s Znacht noeinisch mit Östrichischer-Chuchi. Nach knappe 11 Täg in Kärnte sind mier wieder parat morn is negste Land wiiter z Reise.Read more

  • Day59

    Wanderung durch Tsche...

    October 29, 2020 in Austria ⋅ ⛅ 5 °C

    Mier fahred früe los zu de Tscheppaschlucht. Ufem Wäg lised mier d Info Tafele no gnau dure. Ganz unne vom Plakat staht sogar druff "Wanderung durch Tsche... chien" fast e chli erschrocke wie wiit mier ez gfahre sind, gmerkt d Jasmin no gnueg früe, das sie eifach falsch gläse het. So bliibed mier in Östriich und "Wandered dur d Tsche...ppaschlucht. 😉
    Knappi drü Stund, ungfähr 100 fötteli und eis Picknick später chömed mier bim Ändpunkt ah. Da mier noned gnueg hend, laufed mier no wiiter zum Meerauge wiiter, das isch en stahlblaue See mit vielne Sagene und ere Uralte Entstehig. Ufem Rückwäg wird üs bewusst, das de negst Bus erst innere Stund fahrt, so laufed mier lieber wider zrugg zum Parkplatz und chömed en Stund spöter au det wieder ah.
    Obwohl mier nach 26'000 Schritt (18km) langsam chli erschöpft sind, möchted mier nomal uf de Pyramidenkogel (dasmal dank de Touristekarte sogar Gratis) um die schön Abigstimmig chönne z gniesse. Und wie chentmer de Abig besser la usklinge, als bimne feine Fondu und sälbergmachtem Glüewii?
    Read more

  • Day58

    Hoch Hinaus

    October 28, 2020 in Austria ⋅ ☁️ 6 °C

    Mier nämed am Morge s Bähndli nach Brunach id Höchi vo 1800m. Gmüetlich mached mier en schöne Rundwäg womer chli dur de Schnee stampfe chönd und gniessed so d Ussicht vo dere Höchi.
    Ufem Rückwäg mached mier no en halt im Shoppingcenter um bar wichtigi Bsorgige z mache. Wiiteri Wienachtsdeko darf natürlich au nid fähle.
    Uf de Abig ghöred mier vo de neuste Informatione vom Bundesrath und gmerked das sich d Risikogebiet stark verändered hend. Ez sind mier gspant wo üs üsi Reis no anefüehrt.
    Read more

  • Day57

    En Bonsai für s ganze Läbe

    October 27, 2020 in Austria ⋅ ⛅ 10 °C

    Nachdem s die ganz Nacht grägned het gmerked mier langsam, dass üs s schlächte Wätter vom Vortag doch no igholt het. Gäge Mittag wirds de langsam besser und mier nämed Kurs uf s Bonsai Museum. Mier lerned einiges über d Kunst und Philosophie vonere Bonsaipflanze und laufed dur de grossi Japanischi Garte voll mit Bonsais. De Drang en Bonsai z chaufe isch gross, aber de Platz und d Läbensumständ für de Bonsai i üsem Camper spriched Starch degege...
    Wiiter fahred mier (ohni Bonsai) zu Klagenfurt am Wörtherse und schlendered dur d Gasse. Mit de Winterziit wo langsam Ibroche isch wirds schnell dunkel, dasmier üs langsam wieder ufe Häiwägmached.
    Read more

  • Day56

    Panorama Strasse

    October 26, 2020 in Austria ⋅ 🌧 4 °C

    Luut Wätterbricht setts bis zu üs Schniiä. Also lueged mier am Morge gspannt use, obs über Nacht het möge schneiie. Nid bis zu üs, aber gar nid so wiit entfärnt hets Schnee agsetzt. Will hüt schlächtwätter agseit het und d Östricher ihre Fiirtig ernst nämed bliibt üs nümm so en grossi Uswahl a Tagesaktivitäte. Mier entscheided üs für en Usflug über d Panoramastrass zur Kölnbrein-Staumauer. Im Naturpark mached mier en Spaziergang am See entlang und gniessed nah Kaffe und Öpfelstrudel im Panorama Resturant. Ufem Rückwäg gsend mier die viele Wasserfäll und wunderschöni Herbststimmig nomal a üs verbiifahre. En Bsuech im Naturlädeli darf natürlich au nid fähle, wo üs ab etz en chline Wichtel uf de Reis begleited. Zrugg ufem Camping gmerked mier immernonüt vo dem Rägewätter wo de Wätterbricht üs eigentlich versproche het. Trotzdem mached mier üs chli a üses Schlächtwätter Hobby und häggled no chli a üsne Schäl wiiter.Read more

  • Day55

    Schnee, schnee, schnee

    October 25, 2020 in Austria ⋅ ⛅ 1 °C

    Mier gniessed die wunderschöni Morgestimmig, da d Sunne scho voller freud schint, bis mier ufstönd... Danke Ziitumstellig 🤗
    Mit üsere Touristecharte gönd mier uf de Mölltaler Gletscher, laufed ume Eisee und gniessed s Panoramabeizli.
    Nah lueged mier es Kapälleli ah, wo mier scho vo wiitem gseh hend. Ufem Rückwäg gmerked mier den aber, das mier s Falsche Kapälleli agluegt hend und nämed nomal Kurs uf s Richtige. Nach dere schöne Ussicht bsueched mier no d Burg Falkestei. Wiedereinisch hend mier chli fest am Navi vertraut und hend wohl de Waldwäg verwütscht. Nachmene churze Fuessmarsch erreiched mier den aber d Burg glich no. Da s scho glii am idunkele isch gönd mier zrugg zu üsem Camping und gniessed d Abigstimmig.
    Read more

  • Day54

    Entspannt gads wieder id Chälti

    October 24, 2020 in Austria ⋅ ☁️ 7 °C

    Nachmene feine Zmorgebuffet und drü Täg mit vill z vill Ässe, rugled mier usem Wellness Hotel use. Leider spillt s Wätter nid so mit und so mönd mier zerstmal es bar Plän sammle. Mier fassed de Plan, die negste paar Täg wiiterhin i de Region Kärnte z Bliibe und dönd üs d "Kärnte Touristcard" zueche
    Als erst gönd mier i Wildtierpark. Det isch es Museum mit diverse Usgstopfte Tier (wo üs irgendwie alli Agstarrt hend). Nah laufed mier dur de Streichelzoo und gönd wiiter i Bereich vo de Hirsche, Reh und Geisse. Sogar en "Hippi-Traktor" gsend mier dette.
    Wiiter gad üsi fahrt zu de Raggaschlucht. Erst det devor gsend mier das sie leider scho zue het. Chli entdüscht mached mier üs ufe Rückwäg. Nach churzer fahrt chömed mier a de Groppensteinschlucht verbii. So gniessed mier de wunderschöni wäg a de Wasserfäll entlang dochno. Chli i de Höchi im Dorf Mallnitz finded mier en Moderne Camping uf 1200m höchi. Zum glück hend mier immerno schön Warm im Camper.
    Read more

  • Day51

    Ziit zum Usspanne

    October 21, 2020 in Austria ⋅ ⛅ 9 °C

    Nach dene drü Nächt uf dem schöne Camping, gad üsi Reis wiiter.
    Mier fahred a Wörthersee und gönd uf de Pyramidekogel (wie sich s für Touriste ghört)
    Uf knapp 70m höchi gniessmer d Ussicht, und bestuned s Bild wo ufe Bode zeichnet isch. Üs Fallt schnell uf, dases nümm s gliche Bild isch, wiemer uf Google Maps gseh het... Hmmm spannend 🤷🏻
    Im Restaurant wird no es Typisch Östrichischi Mahlziit bstellt und wiiter gad üsi Fart is Dorf Tröpolach.
    Hie gönned mier üs drü Täg im Wellnesshotel Falkenstein und spanned wieder einisch richtig us. Das hend mier üs Verdient 😉
    Read more

  • Day50

    Vom einte See zum Andere

    October 20, 2020 in Austria ⋅ ⛅ 7 °C

    Nachmene Königliche Zmorge mit Rüerei, Spiegelei und Späck gönd mier chli id Höchi. Üsi Route füerd üs amne Burehof mit Pfaue, Hüener und Änte verbii. Es stückli dur de Wald und scho glii chömed mier im Alperestaurant Bergfried ah. Uf de "Sterneterasse" gniessed mier de Usblick uf de Millstättersee. Natürlich darf es Kaffe und Dessert au nid fähle. Imne schöne Rundgang laufed mier wieder zrugg a Afangspunkt.
    Zrugg gads zu üsem Campingplatz am Faakersee, langsam finded mier de Wäg sogar scho ohni Navi. Zum Glück hend mier no Reste und so isch s Znacht gschnell koched (oder de Glüewii ufgwärmt).
    Read more

Join us:

FindPenguins for iOSFindPenguins for Android