Göteborg + Malmö

Dr Wäg uf Göteborg hetsech zogä, abr womer du ändlech si aacho, simr ab ufä Camping. Dä isch erstuunlech vou gsi!
Z' Wätter isch sehr rägnerisch u chaut, ds scho sit lengerem. Nid so gmüetlech...
Am nächschtä Tag simr ga Göteborg aluege. Zersch simr grad Richtig Autstadt gloffä u si ungerwegs inä Chiuchä, wo vo uss u o dinn, mau ganz angers isch gsi. Sie isch us häuä, gäublechä Bachsteinä bbouä u innä ganz wiss u mit LED-Chronlüchter. Ir Autstadt aacho simr dür d' Haga Nygata, dsch so d' Houptstrass vor Autstadt hets gheisse. Ganz schmuck, mit vilnä chliinä Lädeli u Kafis. Het üs sehr gfaue! Witr simr ufnä Hoger ufä, womä über die ganz Stadt het chönnä gseh. Widr dunger simr nomau ä Chiuchä gah luege, dises Mau widr ganz ä klasseschi prunkvoui u när witr zum Fischmarkt. Dä heisst "Feskekörka" u isch würklech wiene chliini Chiuche bboue. Gseht ganz toll us u o dinne isches sehr schön gmacht mit vilne Thekä, wome entweder dr Fisch cha chouffe, odr grad direkt öppis Wunderbars cha ässä.
Glich ufboue mitem Früschverchouf u Ässä si d' Saluhallen. Aues i auem isch Göteborg ä interessanti u tolli Stadt, womä übrigens wunderbar Gäud cha usgäh...
Dr Platz am Aabä ufem Camping heimr üs no chle müesse erkämpfä, was Närvä koschtet het. Im strömendä Rägä heimr lang gwartet, dass öpper at Reception chunnt, hei anstatt am Petersson am Gustavsson aaglüte u si schlussendlech vomnä guet-usbildetä u uniformiertä Sicherheitstyp ufä Camping glah wordä. Am nächschtä Tag heisech aui Rätsu glöst u mir hei mit derä Kuriosität chönnä abschliessä.
Itz simr no ab i Botanisch Gartä gfahrä. Dsch dr gröscht vo Europa u dä heimr üs nid wöue lah entgah. Är isch ungloublech gsi, mitere riiiisä Viufaut ah Pflanzä u wunderbarer Umgäbig. Ufem Ussichtspunkt heimr du no entdeckt, dasses ganz ir Nöchi äs grosses Naturhistorischs Museum het mitem einzigstä usgstopftä Blauwal vor Wäut! Spontan heimr entschidä, däm no ä Bsuech abzstattä.
Ganz es tolls Museum (fr u25-Lüt sogar gratis!), mit meeeeeeega viu Tier (schiins 15 Mio. verschideni) und vorauem dr Blauwal isch sehr iidrücklech gsi!
Nach dem Bsuech simr witr uf Malmö gfahrä u när ufnä tollä Camping am Meer. Ungerwegs heimr no Hunderti Wiudgäns formatiert i Süde gseh zieh. Biudhübschä Aablick wo z' Nils Holgersson-Härz het lah schmelzä!
Hüt simr Malmö gah aaluegä. D' Sunne het üs gweckt u isch, begleitet vom Wind, dr ganz Tag nid vo üserä Sitä gwichä.
Malmö het o widr ä ganz eigeti, fründlechi, offeni u härzlechi Art, wo üs sehr het gfauä. Dürnä Park simr zurä Windmühli cho u dürnä Schlossgartä simr as Meer gloffä. Dert vor heimr d' Atmosphärä u d' Meersicht gnossä u si chle verwiilet. Mir hei scho ufd Brügg gseh, wo uf Kopenhagen füehrt.
Nach dem chliinä Pöiseli simr witr dür d' Autstadt u hei üs när äs nätts Restaurant frs Zmittag gsuecht.
Nachem Ässä heimr üs ufä Wäg gmacht fr uf Kopenhagen u si über die riiiiiisä Brügg, wo übers Meer füehrt, gfahrä. Sehr iidrücklech gsi, so rundumä nur Meer z' gseh.
Z' Kopenhagen aacho isch d' Campingsuechi losgangä. Anschiinend sisi hie nid so Fan vo Schiuder u so isches rächt ahsträngend gsi... Schlussendlech heimr äs Plätzli gfungä, imnä wahnsinns Camping irä autä Festig. Nid günstig, abr rächt kuul. Morn geits uf Kopenhagen.Read more