Burgos

Hüt simr Burgos gah aaluegä. O widr ganz äs schöns Stedtli! Mir si us ersts zumnä Tor, wo früecher eis vodä Stadttor isch gsi. Sehr majestätisch! Innä hets ä chliinä Ruum, wo d' Dili im arabischä Stiu verziert isch – ganz hübsch! Witr heimr dürnes schmaus Türli ufnä chliini Plattform chönnä, womä wunderbar ufd Strassä abägseht – und dä Blick hets inn sich gha: zum eintä wunderschöni Hüserreihä mit tollä, verschnörkletä Baukön und zum angerä Blick ufnä wunderbari Allee mit stouzä Böim.
Widr dunger simr d' Kathedralä gah luegä, wo vo uss äs mega Bijou isch mit ihrnä vilä chliinä Türmli.
Nach däm mir imnä Restaurant si ga Zmittag ässä, heimr üs ufnä Verdouigsspaziergang gmacht u si zurä Burg, chle oberhaub vor Stadt gloffä. Vor Ussichtsplattform dert obä hetmä ä atemberoubendä Blick übers Ganzä gha u het wit übers Land gseh!
Widr dunger simr zum Alj u när widr ufä Camping womr scho si gsi.
Dä Camping isch ca. 20min vor Stadt wäg gsi u fr dert härä hetmä dürnes zuckersüesses Dörfli müessä fahrä! Wunderhübsch hei d' Hüsli mit ihrnä Bluemächleidr mitr Sunnä umd Wett gschunä, näbem Spiuplatz isch Grossvati am Bodä ghocket u het Bohnä erläsä u im Beizli witr vor si Aut u Jung zämä eis gah ziäh. Dä Charme het üs umghouä!
Morn geits witr uf León.

PS: ar Steffi ihres Handy het dr Absprung is chüehlä Nass gwagt und isch itz im Ruhestang... Sponsor frnes Nöis? ; )Read more