Algarve

Die letschti Wuchä heimr ar Algarvä verbracht. Vo Sagres, simr über Lagos u Alvor uf Faro.
Z' Sagres, simr zum südwestlechstä Punkt vo Europa, zum Cabo de São Vicente. Ungerwägs simr no inä Töpferladä mit wunderschönä Sachä.
A däm Kap aacho, simr zum Lüchtturm fürä u hei z' Meer u d' Klippä bestuunt. Sehr imposant!
Nachemnä churzä Spaziergang über Stock u Stei mit Blick ufs unändlechä Meer, simr "die letzte Bratwurst vor Amerika" gah ässä.
Nach däm Happä simr mitem Alj zumnä Strand.
Dert hets vo Surfer gwimmlet!
Ah däm schönä Strand simr paar Stung verwilet, hei mit dä Wäuä tanzet, si vo dr Fluet überrascht wordä (nassi Tüechli si z' Resultat), hei d' Surfer i ihrem Elemänt beobachtet u si vor Sunnä gwermt wordä. Aues i auem heimr "die Seele baumeln lassen" u heis eifach gnossä!
Am nächschtä Tag heimr üs ufä Wäg nach Lagos gmacht u hei üs no ä Abstächer erloubt: Farol Da Ponta Da Piedade heissts dert u isch ä Aasammlig vo ungerschidlechschtä Feusä im Meer. Wunderschön die Steibögä i ihrem orange-bruunä Farbton im Kontrast zum zouberhaftä grüen-blauä Meer z' gschouä! Witr simr uf Lagos inä. Z' Stedtli isch ganz hübsch, mit viunä Kafis u Restaurants u gränzt ar eintä Sitä as Meer u ufdr angerä Sitä wirds vo urautä Stadtmuurä begränzt.
Itz simr no anä Strand ir Nööchi vo Ferragudo, hei badet u dr Sunneungergang gnossä u si när ufnä Camping. Leider isch dä privat gsi – dasses ds git, heimr nid grächnet. So simr haut no witr u hei schlussändlech z' Alvor ä sehr Tollä gfungä.
Am nächschtä Tag simr zur Höhli vo Benagil. Vom Strand us chamä die Höhli mitemnä Schwumm vo 100m erreichä. Sehr iidrücklech die Steimassä! Widr zrügg am Strand simr no chle verwiilet u när zrügg ufä Camping.
Nachdr 2. Nacht uf däm Camping simr inä witerä Tag gstartet. Hüt het dr Dave mit üsem Camping-Nachbar ä Töfftour chönnä machä u d' Dana u d' Steffi si zämä Ferragudo gah erkundä u när no a Strand.
Gstartet het dr Tag miteme Plattä im eintä Töff. Dr Nachbar isch mit ihm inä Wärchstatt u speter mitem ganzä Töff widr zruggcho. So heisisech zwäggmacht u si umä Mittag um los. Ungerdessä si d' Dana u d' Steffi scho los. Ferragudo isch äs bezoubernds Stedtli mit wunderschönä, vo Bougainvillea-Pflanzä bewachsenä, Hüser u härzigstä Gässli. Nachemnä Ufenthaut am Strand simr widr ufä Camping, wüu mir mitem Dave hei abgmacht. Da die zwe Herrä nachemnä actionriichä u schweisstribendä Tag gägä Aabä techneschi Schwirigkeitä hei gha, isch du d' Träffzyt verschobä wordä u frs augemeinä Wouh, heimr entschidä, nomau ä Nacht z' blibä. Schlussändlech simr wouhbehautä aui 3 widr vreint gsi u hei bimnä feinä Znacht änang vo üsnä Erläbnis a däm Tag brichtet.
Hüt isch dr letscht Tag Algarvä gsi u somit o dr letscht Tag Portugal uf üserä Reis.
Mir hei uscheckt u si uf Faro gfahrä. Dert aacho simr dür d' Gassä gschlenderet. Die Gassä si vo Sunnäsägu überdacht gsi, was aagnähmä Schattä het bracht. Nach däm mir verschideni Eggä vo däm Stedtli si gah erkundä simr ines Restaurant mit lokalä Spezialitätä gah ässä. Ghocket simr imnä Gartä unger Zitronä- u Papajaböim, näbemnä Papagei u zwüschä verschidenstä Pflanzä. Sehr aagnähm u hübsch gsi!
Nachem Zmittag simr witr u hei im "Chelsea", ä Gelateria, üs no Glace gönnt. Zwüschä verschidenä u spezieuä Sortä hetmä chönnä wählä u scho bim Uswählä isch eim z' Wasser im Muu zämägloffä! Scho bim erstä Schläck isch klar gsi: ds isch ä Goumäschmous par excellence!
So simr zum Alj u när bis uf Spanie gfahrä u dert z' Isla Cristina ufnä Camping.
Portugal isch absolut äs Campingland u mir heis sehr gnossä. Äs isch mega empfählenswärt!Read more